Slagregister ga kvalitetsheving - og pris 

PRISVERDIG: Slagoverlege Halvor Næss (øverst i biletet) ved nevrologisk avdeling på Haukeland universitetssjukehus er tildelt årets Kvalitetspris for Helse Vest. Blant gratulantane er styreleiar Oddvard Nilsen (til venstre), prosjektleiar for kvalitetssatsinga Anne Grimstvedt Kvalvik, og fagdirektør Baard-Christian Schem – alle frå Helse Vest RHF (Foto: Kjetil Alsvik). (Høgoppløseleg foto kan lastast ned her)

- Tusen takk, eg gler meg spesielt til å fortelje at eg har fått denne prisen til den yngste dottera mi, bukka slagoverlege Halvor Næss då han mottok Kvalitetsprisen for Helse Vest torsdag kveld:
- For eit par år tilbake, då ho nær sagt som vanleg fann meg sitjande å taste på PC-en i sofaen, spurte ho meg ”er dette hobbyen din?”. Så small ho til: ”GET A LIFE!”

Inspirasjonskjelde
I grunngivinga for å gi Næss kvalitetsprisen, brukar juryen ord som ”drivkraft” og ”inspirasjonskjelde”. Som overlege ved nevrologisk avdeling på Haukeland universitetssjukehus oppretta Næss i 2006 eit nyskapande register for slagpasientar. Sidan har Næss drifta og vidareutvikla NorStroke, til å levere datamateriale til både kvalitetsarbeid og forsking. Sjølv er hovudpersonen forbløffa over resultatet:

- Målet mitt med å opprette databasen var å få halde fram med slagforskinga frå doktorgraden, men det viste seg raskt at registeret også ga informasjon til å auke kvaliteten på mange område innanfor slagbehandlinga.

Bonusvinst
Behandlingsmetodane for slag har endra seg mye dei siste åra, og datamaterialet i NorStroke har gjort det mogleg å studere pasientforløp og evaluere effekten av behandling som blir gitt. Registeret har vidare vore basis for ei lang rekkje vitskapelege arbeid, så ulike faggrupper som fysioterapeutar, ergoterapeutar, logopedar, medisinstudentar og ein økonom har nytta slagdatabasen til forsking.

- Det mest overraskande å sjå er kor høveleg registeret viser seg å vere for andre,
NorStroke har gitt ei rekkje utilsikta bonusvinstar, seier Næss, og legg til:
- Kanskje fleire for andre enn for meg sjølv, eigentleg.

Ulønna fritidssyssel
Dei 100.000 kronene som følgjer Kvalitetsprisen, er eit beskjeden beløp målt mot Næss sin uløna arbeidsinnsats. Gjennom seks år har Næss på eiga hand tasta inn informasjon om brorparten av dei drygt 2400 pasientane i databasen: Liggjetid, forløp, behandlingsform og komplikasjonar, utskrivingsdata, sjukehistorie og radiologiske og serologiske undersøkingar.

- Eg sit stort sett med dette mellom klokka sju og åtte kvar morgon og samt litt på kveldane, seier Næss:
- Det går greitt no som ungane er vaksne.

Kvalitet – og kvantitet
Mellom slaga på Haukeland universitetssjukehus har Næss også vore aktiv i utviklinga av kvaliteten på slagbehandling nasjonalt. Næss har blant anna leidd arbeidet med nasjonale retningslinjer for førebygging av hjerneslag. Også her har informasjon frå NorStroke vore sentral. – Næss har publisert 16 vitskapelege artiklar med slagregisterdata dei siste tre åra. Har så prisvinnaren eit innspel til den storstilte satsinga på auka kvalitet i spesialisthelsetenesta?

- Har ein dedikerte personar som fører register over pasientbehandlinga, er mi erfaring at ein får forbløffande mye tilbake – både i form av kvalitetsauke og forskingsresultat.