Det er etablert lærings- og meistringssenter (LMS) i alle helseføretaka i Helse Vest. LMS er eit opplæringssenter for pasientar med kronisk sjukdom eller nedsett funksjonsevne, og deira pårørande. Målet for tilbodet er å bidra til auka livskvalitet gjennom betre meistring av livet med sjukdommen.
Ein grunntanke i arbeidet ved lærings- og meistringssentra er at brukarerfaringar skal vere utgangspunktet for rettleiing og informasjon. Læringstilbodet blir derfor utvikla i tett samarbeid med fagmiljøa i sjukehusa og dei enkelte brukarorganisasjonane.
Fleire av helseføretaka har desentralisert lærings- og meistringsfunksjonen slik at tilboda skal vere lettare tilgjengelege for brukarane. Det er utvikla og teke i bruk ein database som gir samla oversikt over alle dei ulike kursa for pasientar og pårørande i helseføretaka i regionen.
På nettstaden til Regionalt kompetansesenter for habilitering og rehabilitering finn du ei samla oversikt over lærings- og meistringstilbodet i regionen.