Mål 1
Vi skal identifisere, førebyggje og handtere risiko for pasientskadar i vår eining
Pasientskadar som kunne vore førebygga er kostbart for pasientar, pårørande, medarbeidarar, tenestene og samfunnet, i form av belastning, tillit og pengar (Meld. St. 9 (2023–2024) - regjeringen.no). Systemfeil og pasientskadar kan oppstå som følge av faktorar på fleire nivå (pasienten, oppgåva, individet, teamet, verktøya, leiinga og organisasjonen) i helsetenesta. For å auke pasienttryggleiken og redusere skadar, er det avgjerande med ei strukturert og kontinuerleg tilnærming til risikohandtering, der alle aktørar bidreg aktivt.
Innsatsområde under mål 1
Innsatsområde 1: Kvar avdeling skal legge til rette for systematisk dialog om risiko for enkeltpasientar og pasientgrupper.
Systematisk samtale om risiko, både for individuelle pasientsituasjonar og på tenestenivå, er avgjerande for å identifisere og handtere risiko tidleg. Ved å etablere faste arenaer for dialog om pasienttryggleik og risikovurdering kan medarbeidarar i både kliniske og støttefunksjonar overvake og reagere på potensielle risikoar, anten dei kjem av pasienttilstand, miljøfaktorar eller informasjonsflyt.
Denne systematiske tilnærminga er viktig både for einingar med direkte pasientkontakt og for støttefunksjonar som bidreg til ein sikker pasientflyt. For kliniske einingar med behandlingsansvar bør daglege risikovurderingar vere ein fast rutine, medan støtteeiningar gjennomfører regelmessige samtalar for å identifisere og handtere risiko i prosessane sine. Døme på slik systematisk dialog inkluderer sjekkliste for trygg kirurgi, og pasienttryggingsmøte som gir ei samla vurdering av risiko på tvers av funksjonar og roller i organisasjonen.