Utlysning av midlar til innovasjon

Regional utviklingsplan og Nasjonal helse- og samhandlingsplan 2024-2027 - Vår felles helsetjeneste ligg til grunn for dei prioriterte satsingsområda for utlysinga i 2026.

Helse Vest RHF vil prioritere prosjekt som bidrar til gevinstar for helsetenesta gjennom meir optimal organisering og ressursbruk, eller som reduserer behovet for auka bemanning. Prosjekt med potensial for regional skalering blir særleg vektlagt.

Prioriterte satsingsområde 

Helse Vest RHF vil særleg prioritere søknader som tar for seg eitt eller fleire av følgande satsingsområde:

• Styrking av helsekompetanse og brukarmedverknad: Prosjekt som  gir pasientar og pårørande ein meir aktiv rolle i utforminga av eigen helsehjelp, slik at helsekompetansen og evna til eigen meistring aukar.
• Berekraftig utvikling: Tiltak som fremjar nye arbeidsformer, betre oppgåvedeling eller samarbeid – både innan spesialisthelsetenesta og på tvers av nivå, gjerne i samarbeid med primærhelsetenesta. Også prosjekt som tek i bruk ny teknologi og løysingar som bidreg til meir effektiv ressursbruk og minskar behovet for auka bemanning.
• Redusere overdiagnostisering og overbehandling: Løysingar og tenesteinnovasjon som bidreg til mindre uønska variasjon i diagnostikk og behandling, gjerne gjennom samarbeid på tvers av nivå i helsetenesta.

Prosjekta/tiltaka kan vere nye eller allereie i gang. Det  vil i tillegg bli lagt  vekt på prosjekt:

• som har samarbeid med fleire helseføretak i regionen, der dette er relevant
• som har planar om å søke finansiering frå andre finansieringskjelder

Prioriterte pasientgrupper

Helse Vest er særleg opptatt av søknadar som omhandlar dei fem prioriterte pasientgruppene i Nasjonal helse- og samhandlingsplan:

• personar med alvorlege psykiske lidingar og rusmiddelproblem
• barn og unge
• personar med fleire kroniske sjukdommar
• skrøpelege eldre
• svangerskap, fødsel og barseltid

Innovasjonar med eit kommersielt potensial

For innovasjonar med eit kommersielt potensial gjeld ingen tematiske føringar eller prioriterte pasientgrupper.

Det blir lyst ut midlar i to søknadskategoriar. Det kan søkast i éin av følgjande to kategoriar

1. Nye innovasjonsprosjekt

Denne kategorien gjeld prosjekt som blir gjennomført ved eige helseføretak (prosjekteigar). Her kan det bli søkt om midlar til nye idéar, eller prosjekt som allereie har starta opp. Same prosjekt kan få stønad frå innovasjonsutlysinga til Helse Vest RHF to gonger.

Maks stønad frå Helse Vest RHF er 1,2 millionar kroner i denne kategorien. Dersom prosjektet er i ei tidleg fase kan det vere tenleg å søke om eit mindre stønadsbeløp (gjeld også for innovasjonar med kommersielt potensial).

For å kvalifisere til maks stønad i denne kategorien må det vere samarbeid mellom minst to helseføretak i Helse Vest (gjeld ikkje innovasjonar med kommersielt potensial).

2. Idéoverføring 

Ein kan søke om støtte for å ta i bruk eller teste ut innovative løysingar som allereie har vist gode resultat ved andre sjukehus eller helseføretak, både innanfor Helse Vest-regionen og elles i landet eller internasjonalt. Målet med dette er å bidra til spreiing av vellykka innovasjonar og løysingar som allereie er implementerte i helsetenesta.

I søknaden må de grunngi kvifor de ønskjer å adoptere eller teste ut akkurat denne løysinga, kva for konkrete gevinstar og effektar de forventar, samt korleis de planlegg å samarbeide med organisasjonen de skal adoptere løysinga frå. Maksimal stønad i denne kategorien er 400 000 kroner.

Relevans for satsingsområda (10 %)

1. Ideoverføring
   1. Treff relevante tema, pasientgrupper og satsingsområde
   2. God grunngiving for val av løysing
   3. Viser læring frå institusjonen ein adopterer frå
   4. Potensial for regional nytte og spreiing
2. Nye innovasjonsprosjekt
   1. Treff relevante tema, tema, pasientgrupper og satsingsområde
   2. Klart potensial for regional nytte og spreiing
   3. Oppfyller krav til samarbeid (minst to HF for maks støtte)

Innovasjon og kunnskapsbehov (30 %)

• Ideoverføring
  • Løysinga adresserer eit tydeleg behov
  • Relevans for pasientgruppe eller fagområde
  • Kort kunnskapsoppsummering / kartlegging av liknande tiltak
  • Plan for lokal tilpassing og vidare utvikling
• Nye innovasjonsprosjekt
  • Løysinga adresserer eit tydeleg behov
  • Byggjer på kunnskap eller tidlegare utprøving?
  • Bruk av relevant innovasjonsmetodikk
  • Behov for forsking eller dokumentasjon omtalt

Gevinstar og nytte for pasientane og helsetenesta (30 %)

• Begge kategoriar Nytte/gevinstar
  • Tydelige og truverdige gevinstar for pasientane
  • Gevinstar for helsetenesta (t.d. ressursbruk, arbeidsflyt)
  • Potensial for spreiing regionalt og nasjonalt
  • Eventuelle samfunnseffektar (t.d. berekraft) omtala
• I tillegg for Nye innovasjonsprosjekt:
  • Eventuelt kommersielt potensial omtalt
• Plan for realisering
  • Realistisk plan for gevinstrealisering
  • Plan for drift og forvaltning etter prosjektet
  • Planar om vidare finansiering? (f.eks. frå IN/NFR/EU)

Gjennomføring (30 %)

• Ideoverføring
  • Realistisk prosjektplan og ressursbruk/budsjett
  • Klare roller og ansvar mellom partnarar
  • Godt samarbeid med institusjonen ein lærer frå
  • Relevante aktørar er involverte
  • Brukar- og leiingsforankring er ivaretatt
• Nye innovasjonsprosjekt
  • Realistisk prosjektplan og ressursbruk/budsjett
  • Klare roller og ansvar mellom partnarar
  • Relevante aktørar involverte (HF, kommunar, HVIKT, Sykehusinnkjøp, næringsliv)
  • Brukar- og leiingsforankring
  • Juridiske og rettigheitsmessige forhold omtala

Søknadene vil først bli vurdert og prioritert internt i det aktuelle helseføretaket før dei blir sendt vidare til behandling i ein regional komité. Den regionale komiteen består av representantar frå Helse Vest RHF/helseføretak/privat ideelle aktørar/regionalt brukarutval, og har ansvar for den endelege vurderinga og prioriteringa av søknadane. Komiteen skal sikre ei rettferdig og heiheitleg behandling basert på felles kriterium, og sørgje for at prosjekta som blir anbefalt har brei strategisk forankring i regionen.

Leiarmøtet i Helse Vest RHF vil avgjere den endelege fordelinga på bakgrunn av komitéen sitt arbeid. Ved tildeling vil det bli lagd vekt på å oppnå ei spreiing av prosjekt i ulike delar av regionen og innan dei ulike satsingsområda.

Alle søkarar vil få ei kortfatta tilbakemelding av overordna karakter.

Samandrag av  prosjekt som får stønad vil bli  publisert på internett.

Prosjektleiar må ha hovudstilling ved eit helseføretak i Helse Vest, eller  ein privat ideell institusjon/sjukehus som har driftsavtale med Helse Vest RHF. Søknaden må sendast inn via institusjonen som har søknadsrett.

Prosjekt som tidlegare har fått stønad frå Helse Vest si innovasjonsutlysing, kan søke på nytt dersom dette inneber ei vesentleg vidareutvikling av prosjektet. Tidlegare støtte skal bli gjort greie for i søknaden.

Prosjekta må ha solid strategisk forankring i sjukehuset eller føretaket, slik at sjansen aukar for at løysinga faktisk blir tatt i bruk dersom innovasjonsprosjektet lykkast. Prosjekteigar eller partnarar må bidra med ein obligatorisk eigenandel på minst 20 % av dei totale prosjektkostnadene. Søker de Helse Vest om 1,2 millionar kroner, skal eigenandelen frå prosjektgruppa minst utgjere 300 000 kroner, for eksempel gjennom eigeninnsats som frikjøp av personalressursar.

For idéoverføring er tilsvarande beløp minimum 100 000 kr om de søker Helse Vest om 400 000 kr i stønad.

Det blir automatisk sendt ein generert e-post til forankringsansvarleg i føretaket, som skal godkjenne søknad og budsjett. Merk at søknaden ikkje blir rekna som fullført før det føreligg ei stadfesting på at forankring er motteke av Helse Vest RHF.

Frist for institusjonell leiarforankring er en uke etter søknadsfrist. 23 mars 2026.

Kva kan støttast?

Personalrelaterte kostnader, kjøp av tenester, og utgifter til utstyr/driftskostnader kan støttast. Utgifter til utstyr kan berre utgjere 30 % av kostnadene. Søknadsbeløpet skal spesifiserast i budsjettmodulen i eSøknad. Budsjettet skal samsvare med definerte milepålar, aktivitetar og innhald.

Finansieringsplanen skal opplyse om direkte kostnadar knytt til aktivitetane som ein søker støtte til, eigeninnsats (timetal x timesats), anna finansiering og søkt beløp frå Helse Vest RHF.

Totalsummen for kostnadane skal være lik totalsummen i finansieringsplanen.

Tildeling av støtte føreset at alle relevante materielle rettar blir tekne vare på, og er i samsvar med reglementet for overføring av rettar til arbeidsresultat frå arbeidstakar til arbeidsgjevar i Helse Vest.

Stønad til eksterne samarbeidspartnarar

Ved samarbeid med kommunar, næringsliv, akademia eller forskingsinstitutt er det eit krav at desse partane bidreg med eigne ressursar til prosjektet. I tillegg kan inntil 20 % av søknadsbeløpet frå Helse Vest nyttast til å finansiere aktivitetar hos dei eksterne aktørane.

Samarbeidet skal skildrast i søknaden. Helse Vest anbefaler at de lagar ein samarbeidskontrakt som gjer greie for dei ulike aktørane si rolle, oppgåver, kompetanse og rettar i prosjektet.

Helse Vest anbefaler at søkjar kontaktar Sykehusinnkjøp HF Vest med tanke på råd og rettleiing der det er aktuelt, om eventuell marknads- og leverandørkontakt før de søkar midlar frå Helse Vest. Sykehusinnkjøp vil kunne rettleie korleis ein skal gå fram for å finne relevante samarbeidspartnar frå næringslivet, også med tanke på ei eventuell anskaffing i etterkant av eit samarbeid.

Dersom løysinga har eit kommersielt potensial bør de opplyse om samarbeid med den TTO-en (Technology Transfer Office) som helseføretaket har avtale med.

Det skal gjerast greie for korleis brukarar (pasientar, pårørande, og/eller helsepersonell) er involverte i planlegging, gjennomføring, formidling og/eller evaluering av prosjektet. Veileder for brukermedvirkning i helseforskning i spesialisthelsetjenesten (mai 2018) kan nyttast i utvikling og gjennomføring av innovasjonsprosjekt. 

Dersom det skal innførast eller utviklast nye IKT-løysningar i eit prosjekt, bør søkarar innhente vurderingar om korleis løysningane skal kunne virke i samanheng med eksisterande infrastruktur og systemlandskap i Helse Vest. Ta kontakt med Terje Bremnes

Helse Vest IKT kan vere ein av samarbeidspartnarane i prosjektet. Dette må avklarast med Helse Vest IKT i forkant av søknaden.

Styringsstruktur for digitalisering i Helse Vest

For å unngå at du som søkar startar innovasjonsløp/prosjekt som dupliserer pågåande eller planlagd aktivitet i regional styringsstruktur for digitalisering, bør søkarar innhente råd frå helseføretakets representant i det relevante delområde. Det kan også  vere lurt å sjekke prosjekt-databasen i  Styringsstrukturen for digitalisering i Helse Vest. Til dette kan du nytte verktøyet Prosjektrapport i Power BI Liste over initiativer - Prosjektrapport - Power BI

Søker har sjølv ansvar for at innsendt søknad er fullstendig og i tråd med søknadskriteria, samt at søknadsskjema i eSøknad er korrekt fylt ut og at obligatoriske vedlegg er lasta opp.

Følgande obligatoriske dokument skal sendast inn:

• Søknadsskjema i søknadsportalen eSøknad
• Prosjektskisse iht. malar som vedlegg i søknadsportalen eSøknad:
  • Mal for prosjektskisse - nye innovasjonsprosjekt - maks 4 sider
  • Mal for prosjektskisse - idéoverføring - maks 3 sider

Det er berre desse dokumenta som skal lastast opp. Andre vedlegg vil ikkje bli vurderte.

Du finn malane til høgre på denne sida.

Søknadar som ikkje oppfyller krava i utlysinga vil bli avviste. Prosjektleiar (søkar) må sikre at søknaden er komplett.

Søknadar med følgande manglar vert avvist utan ytterlegare grunngjevnad:

• Søknadsfrist
  • Søknaden er forsøkt levert inn etter søknadsfristen.
  • Databasen blir stengd automatisk. Søknaden kan ikkje bli ettersendt på e-post.
• Formatkrav og sidetal
  • Prosjektleiar må sikre at det obligatoriske vedlegg er i tråd med formatkrava (sidetal med meir).
• Søknadsbeløp
  • Det er søkt om høgare beløp enn det som er tillate i søknadskategorien.
• Eigenandel manglar
  • Søknaden manglar eigenandel i budsjettet.
• Brukarmedverknad

Prosjektframstillinga manglar informasjon om brukarmedverknad i prosjektet.

• Manglande leiarforankring