Vi tilrår at du alltid nyttar siste versjon av nettlesaren din.

Nytt nasjonalt nettverk for radiologi: Vil redusere unødvendige røntgen- og MR-undersøkingar

Nordmenn blir sende til røntgen, MR og CT sjølv om undersøkingane ikkje gir nytte. No skal eit nytt nasjonalt nettverk og seks konkrete tiltak få ned overforbruk, redusere ventetider og sikre betre pasientbehandling.

En hånd som holder en tavle

Saka oppsummert

  • Sjukehusa, RHF-a, SKDE og DSA står bak eit nytt nasjonalt nettverk for radiologi, som skal redusere unødvendige røntgen-, MR- og CT-undersøkingar.
  • Bruken av bildediagnostikk har auka dei siste åra, og det er store geografiske forskjellar som ikkje kan forklarast av medisinske behov åleine.
  • Nettverket skal bidra til betre styringsdata, nasjonale råd for tilvising og oppdaterte faglege retningslinjer.
  • Dei første nasjonale tilvisingsråda innan muskel- og skjelettradiologi er allereie utarbeidde.

– Vi må slutte å undersøkje pasientar når det ikkje gir nytte. Det er dårleg bruk av ressursar og kan i verste fall skade pasientane. Det kan resultere i auka strålebelastning, overdiagnostikk, unødig bekymring hos pasientane og lange ventelister for dei pasientane som verkeleg har behov for våre tenester, seier Aslak Aslaksen, fagleg leiar av det nyoppretta nasjonale nettverket for radiologi, og overlege og professor emeritus ved Haukeland universitetssjukehus og UiB.  

Bruken av bildediagnostikk har auka dei siste åra. I tillegg er det store geografiske forskjellar i kor ofte undersøkingane blir brukt. Medisinske behov forklarar ikkje variasjonen i landet, i følgje Senter for klinisk dokumentasjon og evaluering (SKDE) sitt helseatlas. 

En mann med briller

Foto: Helse Bergen

Aslak Aslaksen er fagleg leiar av det nyoppretta nasjonale nettverket for radiologi, og overlege og professor emeritus ved Haukeland universitetssjukehus og UiB. 

Skal kutte overforbruket og redusere variasjonen 

– Vi uroar pasientane unødvendig, og utnyttar ikkje dei knappe ressursane vi har i helsetenesta rett. Det er viktig å kutte overforbruket og redusere variasjonen, slik at vi får gode og likeverdige helsetenester, fortset Aslaksen.  

For å snu utviklinga, er det utarbeida seks tiltak. Det viktigaste grepet er ei etablering av eit nasjonalt radiologinettverk med fagfolk frå heile landet.  

I gang med dei første nasjonale tilvisingsråda 

Nettverket er et samarbeid mellom dei regionale helseføretaka, og skal bidra til betre styringsdata, oppdaterte retningslinjer og tettare samarbeid mellom tilvisande legar og radiologiske miljø. 

En kvinne med blondt hår

Foto: Privat

Mia Louise Mowinckel-Nilsen er administrativ leiar av Nasjonalt nettverk for radiologi. 

– Vi har brukt våren på å etablere oss og komme ordentleg i gang. Vi skal blant anna lage felles nasjonale råd for tilvisingar, slik at legar enklare kan vurdere kva undersøkingar som faktisk er nødvendige. Vi har allereie utarbeida dei første nasjonale tilvisingsråda innan muskel-skjelettradiologi, seier Mia Louise Mowinckel-Nilsen, administrativ leiar av Nasjonalt nettverk for radiologi. 

Det nasjonale nettverket skal jobbe vidare med desse seks tiltaka: 

  1. Nettverk for radiologi i Noreg  
  2. Betre styringsdata  
  3. Tilgjengelegheit av undersøkingar på tvers av sjukehus og private røntgeninstitutt  
  4. Utarbeide og oppdatere eller revidere faglege retningslinjer  
  5. Forbetring av tilvisingar til radiologi i primærhelsetenesta og sjukehusa  
  6. Betre kommunikasjon mellom radiologiske avdelingar og tilviser 

 

  • Aslak Aslaksen, fagleg leiar av Nasjonalt nettverk for radiologi, og overlege og professor emeritus ved Haukeland universitetssjukehus og UiB 
  • Mia Louise Mowinckel-Nilsen, administrativ leiar av Nasjonalt nettverk for radiologi 
  • Evabeth Roseth Bruvoll, avdelingsradiograf Haugesund sjukehus, fasilitator regionalt radiologisk nettverk Helse Vest 
  • Morten Troøyen, radiolog og klinikksjef, St. Olavs hospital 
  • Florentina Gorqaj, fagsjef for bildediagnostikk, Helse Sør-Øst RHF 
  • Rut Heidi Haande, radiolog og fagrådsleder bildediagnostikk, Sykehuset Innlandet 
  • Veronica Klingan Berg, seniorrådgiver/koordinator radiologi, Helse Nord RHF 
  • Siw Gøril Skår, seniorrådgiver, Helse Nord RHF 
  • Tove Johansen, analytiker, Senter for klinisk dokumentasjon og evaluering (SKDE) 
  • Eva Godske Friberg, fagdirektør medisinsk strålebruk, Direktoratet for strålevern og atomsikkerhet (DSA)   

  • Ved ei røntgenundersøking blir kroppen din undersøkt ved bruk av røntgenstrålar.
  • Ei MR-undersøking (magnetisk resonans) er ein biletdannande metode, der eit kraftig magnetfelt og radiobølgjer blir brukte for å lage detaljerte bilete av kroppen.
  • Ei CT-undersøking (datatomografi) er ein type røntgenundersøking der det blir teke tversnittsbilder av aktuelle område i kroppen. CT-skanningar gir meir detaljerte bilete enn vanlege røntgenbilete og kan vise bein, organ, blodårar og blautvev. 

Kilde: www.helsenorge.no  

 

Sist oppdatert 07.08.2026