Retningslinjer for utanlandsstipend

Det blir lyst ut midlar to gonger i året med følgjande søknadsfristar:

• 30. april (utreise tidlegast 1. juli og seinast 31. desember i søknadsåret)
• 15. september (utreise tidlegast 1. januar påfølgande år)

Tilsetjing og forankring:

Søkjar må vere tilsett ved eit helseføretak eller ein privat, ideell institusjon i regionen i minimum 20 % stilling. Tilsetjing, inkludert storleik på stillinga og evt. sluttidspunkt, må kome tydeleg fram i CV til søkjar. Ein kan ikkje søkje utanlandsstipend med forankringsavtale.

Prioriteringsrekkefølge:

1. Søkjarar i tidleg fase av forskarløpet, i følgande rekkefølge: postdoktorstipendiatar, andre tidlegfaseforskarar, doktorgradsstipendiatar
2. Seniorforskarar prioriterast deretter i følgande rekkefølge: søknader der opphaldet inneber å etablere nye samarbeid, søknader der formålet ikkje inneber nye samarbeid

Det vert gjort ei heilskapleg vurdering av søknadene opp mot formålet med ordninga.

Utanlandsstipendet kan nyttast til reise- og meirutgifter knytt til eit forskingsopphald i utlandet. Midlane blir forvalta av søkjarinstitusjonen, og utgifter blir refundert gjennom utleggsrefusjon.

Det er ein føresetnad at løn under utanlandsopphaldet blir dekt av arbeidsgivar eller andre kjelder.  

Varigheit av opphald: 

• Du kan søkje om støtte til eit forskingsopphald for 6 eller 12 månader
• Du kan søkje om å dele stipendet inn i to separate periodar av tilnærma lik varigheit (t.d. 3 + 3 månader)
• Tilsette i stipendiatstillingar må avslutte utanlandsopphaldet seinast tre månader før stipendperioden avsluttast

Du kan søkje om å få dekt følgjande kostnadar:

• Opphald: Det kan givast støtte til dokumenterte etablerings- og meirutgifter ved opphaldet etter faste satsar. Satsane varierer ut frå om ein reiser åleine eller med familie (definert som ektefelle, samboar eller registrert partner og eventuelle barn under 18 år). Familiemedlemmar må opphalde seg saman med forskaren i heile eller tilnærma heile perioden for forskingsopphaldet i utlandet for å kunne få støtte som familie.

Sjå satsar for søknadsrunden. Alle trekkfrie meirutgifter må dokumenterast. Udokumenterte utgifter er skattepliktige.

• Reise: Reiseutgifter ved oppstart og avslutning av opphaldet (billigaste reisemåte), for søkjar og eventuelle medreisande familiemedlemmar.

I tillegg: Ved samanhengande utanlandsopphald i 6 eller 12 månader kan reiseutgifter for søkjar som reiser utan familie og har barn under 16 år, bli dekte som følgjer:  

• inntil to heimreiser (tur/retur) for å besøke familien dersom det er søkt om 12 månaders utanlandsopphald
• ei heimreise (tur/retur) dersom det er søkt om 6 månaders utanlandsopphald

Slike reisekostnader må leggjast inn og grunngjevast i søknaden.

Døme på meirutgifter (reise/opphald) som kan reknast som trekkfrie (må dokumenterast)

• Reiseutgifter tur/retur (faktiske utgifter)
• Husleige, straum, etc.
• Visum
• Nødvendige vaksiner
• Skulepengar dersom offentleg skule ikkje kan nyttast
• Barnehage (meirutgifter i høve til betaling i Norge)
• Forsikring dersom ekstraforsikring
• Andre driftsutgifter som understøtter føremålet med tilskotet, kan vurderast trekkfritt 

Søknaden skal sendast inn via eSøknad. Det skal lastast opp to vedlegg til søknaden:

1. Prosjektframstillinga

Det er utarbeidd mal for prosjektframstilling som skal nyttast for søknad om utanlandsopphald. Prosjektframstillinga skal innehalde:

• Prosjektbeskriving med mål og innhald for utanlandsopphaldet
• Grunngjeving for val av opphaldsstad og utanlandsk samarbeidspartnar
• Omtale av forventa meirverdi for forskaren sjølv og fagmiljøet heime, samt plan for kompetanse- og kunnskapsoverføring til fagmiljøa ved heimkomst
• Plan for vidare forskingssamarbeid etter opphaldet (t.d. publikasjonar, prosjekt og søknadar)

2. Andre obligatoriske vedlegg

Vedlegga skal lastast opp som eitt PDF-dokument i denne rekkefølga, under «Andre vedlegg» i søknadsskjemaet.

1. CV og publikasjonsliste (siste 5 år) sjå forslag til CV
2. Invitasjon frå det utanlandske forskingsmiljøet
3. Uttale frå eige fagmiljø