Helsetenestene i regionen er prega av aukande etterspurnad, aukande kompleksitet i pasientforløpa og større forventningar til kvalitet. Dette aukar behovet for at spesialisthelsetenesta klarar å sjå kompliserte sjukdomsbilete i samanheng og yte godt koordinert tverrfagleg oppfølging.
Samstundes gir medisinske framsteg nye moglegheiter for diagnostikk og behandling, men kan også gi ytterlegare press på berekrafta i tenestene. Mål 1 skal støtte redusert ventetid, likeverdig tilgang og høg kvalitet i pasientbehandlinga.
Helse Vest skal fortsetje å utvikle ein lærande og berekraftig helseteneste til beste for pasientane. Kontinuerleg forbetringsarbeid for å sikre pasienttryggleiken er ein viktig del av dette. Heilt sentralt er å styrkje pasientar og pårørande sin helsekompetanse og involvering i eiga behandling.
Fram mot 2042
Frem mot 2042 skal tenestene vere tilpassa pasientane sine behov, pasientane skal vere aktive deltakarar i behandlinga, og tenestene skal vere likeverdige og halde høg kvalitet utan uønskt variasjon.
Helse Vest skal bruke teknologiske moglegheiter for å tilpasse diagnostikk og behandling til den einskilde pasienten og byggje ein kultur der forsking, innovasjon og kontinuerleg læring er naturlege delar av drift og utvikling av den kliniske verksemda.
Oppfølging og styring skal byggje på systematisk måling av kvalitet og variasjon, inkludert pasienterfaringar, for å identifisere og redusere uønskt variasjon i behandlingstilbodet.