Betre bruk av teknologi kan gi mindre ventetid

Det skjer mykje innan digitaliseringsarbeidet i Helse Vest. No skal sjukehusa fokusere på betre bruk av dei digitale løysingane dei har , slik at dei får størst mogleg nytte. Det kan gje ein betre arbeidsdag for klinikarane og bidra til å få ned ventetidene i sjukehusa. 

Raskare behandling over nett 

Det er sett i verk mange tiltak for å redusere ventetidene i sjukehusa. Fleire av desse inneber å ta i bruk teknologi og kunstig intelligens (KI) på ein betre måte. Som blant anna eBehandling, som tilbyr rettleia internettbehandling for nokre psykiske lidingar. 

– Rettleia internettbehandling kan spare tid for både pasient og behandlar. Pasientane får moglegheit til å gjennomføre behandlinga heime når det passar, medan klinikarane får moglegheit til å behandle fleire pasientar. Det gjer at vi kan hjelpe fleire av pasientane som ventar på time, seier Hansen. 

KI-støtte til radiologane 

Når sjukehusa skal ta i bruk nye teknologiske løysingar, er det dei fagområda som har utfordringar med lange ventetider som vil bli prioritert. Her vil og KI kunne spele ei sentral rolle.  

– Eit av tiltaka som no blir prioritert, er å ta i bruk KI innanfor radiologi. At KI-verktøy blir brukt til å støtte radiologane, vil lette på arbeidspresset i fagmiljøet, seier e-helsedirektøren.  

Heile fire av fem medisinske pasientar som blir innlagde på sjukehus, må ta røntgen av lungene i løpet av opphaldet. Dersom radiologen kan få beslutningsstøtte frå eit KI-verktøy, kan behandlinga starte tidlegare.  

Meir bruk av automatisering 

– Vi må også redusere manuelle arbeidsoppgåver, slik at helsepersonell kan gjere dei oppgåvene berre dei kan gjere, forklarer ein engasjert Hansen. – No skal vi finne ut korleis vi kan bruke robotbasert automatisering til å hjelpe til med å rydde i ventelister eller handtere oppfylging av fristbrot. 

Ved Osteoporosepoliklinikken på Stavanger universitetssjukehus har dei fått ein «robotkollega», som opprettar og sender ut innkallingsbrev til pasientar etter tildelt time. Roboten bidrar til å redusere manuelt arbeid og frigjer tid for å planlegge meir komplekse pasientforløp og oppgåver. Dette har redusert ventetidene ved klinikken. 

– Det tar tid å ta i bruk ny teknologi, særleg når vi må endre arbeidsprosessar. Enkle løysingar kan ha stor verdi, avsluttar Hansen.