Helse Vest legg plan for demensvekst

Tal frå Statistisk sentralbyrå viser at det fram til 2050 er venta ein enorm vekst i talet på pasientar med demens. I helseregion vest er det estimert at nesten 50 000 kjem til å leve med demens.

Det er kommunane som i utgangspunktet har omsorgsbehovet for desse pasientane, men sidan talet vil auke såpass mykje, kjem dette til å treffe også spesialisthelsetenesta.

– Spesialisthelsetenesta har ei plikt til å gjere ei utgreiing av dei meir kompliserte demenstilfella, og til å hjelpe kommunane med opplæring og kompetanseheving, seier assisterande fagdirektør med ansvar for somatikk, Kim André Noremark i Helse Vest RHF.

Arbeidsgruppe

Dei regionale helseføretaka vart gitt i oppdrag i 2023 frå Helse- og omsorgsdepartementet å utarbeide ein felles rapport på demensveksten. Denne blei gitt ut i fjor haust. Styret i Helse Vest har så bedt om konkrete tiltak til korleis innhaldet i rapporten kan bli implementert i Helse Vest.

For å førebu oss på auken i talet på demente, er det sett ned ei arbeidsgruppe. Her er det representantar frå sjukehusa, det regionale helseføretaket, dei private ideelle, kommunane og pårøranderepresentant.

– Vi skal finne ut korleis vi kan rigge oss i sjukehusa for betre å diagnostisere pasientar med demens, korleis vi kan hjelpe sjukehusa med kompetanseheving, og korleis gjere det lettast mogleg for å kontakte sjukehusa for tilvising og utgreiing av pasientar med demens, seier Noremark.

Heilskapeleg arbeid

Betre samhandling mot kommunane, og meir einsarta og heilskapleg arbeid er nøkkelord.

– Vi skal passe på at vi gjer det likt i heile regionen, seier Noremark.

Arbeidsgruppa skal sommaren 2026 levere frå seg ein rapport med forslag til tiltak og tilrådingar som sjukehusa i vest kan bruke til å klargjere tenestene.