Helse Vest nådde måla i Ventetidsløftet i mai
Helse Vest er den fyrste helseregionen som har nådd måla på alle fagområda i Ventetidsløftet. No held arbeidet fram med å ta ned ventetidene for operasjon, for å sikre eit betre pasientforløp.
Sjukehusa i Helse Vest har jobba hardt for å ta ned ventetidene i tråd med regjeringas Ventetidsløfte. I mars blei innsatsen intensivert, og dette har gitt resultat. Trafikklysmodellen for mai viser at Helse Vest nådde måla på alle fagområda
Det er fyrste gong sidan Ventetidsløftet blei lansert i mai i fjor, at ein helseregion har klart å få grøne lys på alle fagområde.
– Dette er gledeleg, ikkje minst for alle pasientane i regionen vår som har venta på start av helsehjelp, seier Bjørn Egil Vikse, fagdirektør i Helse Vest RHF.
Resultata for juni er ikkje endelege endå, men det ser ut som at dei er godt innafor målet dei også.
Gode pasientforløp
I Ventetidsløftet har det vore mest merksemd på ventetid til start helsehjelp, altså tida frå tilvising til fyrste konsultasjon, og denne ventetida er no i tråd med måla for 2025. Frå starten av satsinga har det samstundes vore viktig for Helse Vest RHF at ein også har merksemd på indikatorar for gode pasientforløp, noko som blant anna inneber at sjukehusa held avtaler om planlagde kontaktar for pasientar som allereie er i forløp (låg andel passert planlagt tid), og at sjukehusa også får betre resultat for ventetid til operasjon. Dette arbeidet inkluderer mellom anna god planlegging av arbeidstid og pasientkontaktar, og gode prioriteringar av pasientar som har størst nytte av helsehjelpa.
– Arbeidet med å redusere ventetider til operasjon vil ha særleg merksemd i tida framover. Ventetidene for operasjon har auka dei siste åra og det er viktig for regionen at vi reduserer dei. Dette vil krevje godt og grundig arbeid med gode pasientforløp i dei kliniske einingane, og vi vil søkje å støtte dette arbeidet så godt som mogleg frå regionalt hald, seier Vikse.
Foto: Jorunn Busk, Helse Vest RHF