Ja til styrking av sikkerheitsposten på Valen
Styret i Helse Vest RHF har godkjent forprosjektet for oppgradering av sikkerheitsposten på Valen sjukehus, som er ein del av klinikk for psykisk helsevern i Helse Fonna
Foto: Eirik Dankel
Den overordna planen for sikkerheitspsykiatri i Noreg viser at fleire blir dømde til tvungen psykisk helsevern. Derfor treng vi fleire sikkerheitsplassar både lokalt og regionalt.
På Valen sjukehus har det blitt arbeidd med bygg og vidare planlegging av oppgradering av sikkerheitsposten sidan 2016.
I styremøte i Helse Vest RHF 12. november 2025 slutta styret seg til at Helse Fonna går vidare i detaljplanlegging og bygging av scenario 2 ved Valen sjukehus. Scenario 2 skal dekkje det regionale perspektivet med 14 sengerom inkludert isolat, samt to skjermingseiningar.
Helse Fonna blir tildelt eit internt lån til finansiering av 90 prosent av styringsramma.
Betre kvaliteten
Valen sjukehus har ein over 100 år gamal og stor bygningsmasse med gjennomsnittleg høg tilstandsgrad og fleire bygningar og uteområde med vernekrav. Dette inneber eit stort behov for oppgradering og rehabilitering, eventuelt nybygg og avhending.
Styret i Helse Vest RHF la stor vekt på at det behov for å betre kvaliteten, både på tilbodet for pasientane og for medarbeidarane som arbeider på sikkerheitsposten på Valen Sjukehus.
Helse Fonna ønsker å gå ut på anbod våren 2026 med byggestart hausten 2026 og ferdigstilling 2027.
Styret godkjende også forprosjektet for bygg E, første fase av byggjetrinn 2, på nye Stavanger universitetssjukehus (Nye SUS). Forprosjektet gjeld eit nytt poliklinikk- og dagbehandlingsbygg på Ullandhaug.