Tildeling av ope utlyste midlar
Desse får forskingsmidlar frå Helse Vest i 2026
58 søknadar er innvilga støtte til forskingsprosjekt i 2026 i Helse Vest. I tillegg får 169 stipendiatar og prosjekt vidareført finansieringa si til neste år. Det er regionalt samarbeidsorgan for forsking og innovasjon som står bak tildelingane.
Tildelinga av Helse Vest frie midlar, utan tematiske føringar, tar utgangspunkt i dei 263 søknadane som er sendt inn innan fristen 15. september. Minimum 75 prosent av Helse Vest sine forskingsmidlar skal gå til prosjekt som søkjer desse midlane.
Samarbeidsorganet sine retningslinjer og rammer for søknadsprosessen er førande for arbeidet som er gjort av dei eksterne vurderingskomiteane i haust, og dei har blitt godt ivaretekne gjennom evalueringsprosessen, leia av professor Tom Mala.
Vurdering av kvalitet og nytte er utgangspunkt for vurdering av søknadene, og i den endelege prioriteringa mellom gode prosjekt, kan også regionalt samarbeid, fordeling mellom fagfelt og mellom forskingsmiljøa bli tillagt vekt. Dette er forankra i retningslinjene for søknadsvurdering. For meir informasjon om vurderingskriteria, sjå formål og kriterium for Helse Vests forskingsmidlar.
Tom Mala trekk fram at det gjennomgåande er høg kvalitet, stor tematisk breidd og hard konkurranse mellom søkjarane. Det var i år særskilt sterk konkurranse i søknadskategorien Open prosjektstøtte der 13 søknader vart innstilte mot 15 i fjor. Samla har 22 % av årets søknader nådd opp i konkurransen, noko som i hovudsak svarer til tidlegare års innstillingar. Les meir om hovudkomiteens innstilling (PDF).
I tillegg til tildeling til nye stipend og prosjekt, har 169 stipendiatar og prosjekt fått vidareført si finansiering.
Tildelingsbrev vil bli sende ut ut så fort som råd og alle søkjarar vil få ei skriftleg tilbakemelding innan tre veker.