Helse Vest lyser ut innovasjonsmidlar for 2026

Det er mogleg å søke i to kategoriar: nye innovasjonsprosjekt eller idéoverføring, der eksisterande løysingar blir testa ut i nye miljø.

– Vi ønskjer prosjekt som kan gi reelle gevinstar for pasientar og helsetenesta. Difor prioriterer vi tiltak som styrkjer helsekompetanse, fremjar berekraftige arbeidsformer eller reduserer behovet for auka bemanning, seier Carina Mæland, seniorrådgivar i Helse Vest RHF.

Søknadsfrist er 16. mars 2026 klokka 23:59.

Prioriterte satsingsområde

Helse Vest RHF vil særleg prioritere prosjekt som handlar om:

• Styrking av helsekompetanse og brukarmedverknad: prosjekt som gir pasientar og pårørande større rolle og auka meistring.
• Berekraftig utvikling: Tiltak som fremjar nye arbeidsformer, betre oppgåvedeling eller samarbeid – både innan spesialisthelsetenesta og på tvers av nivå, gjerne i samarbeid med primærhelsetenesta. Og bruk av ny teknologi og løysingar som effektiviserer tenestene og minskar behovet for auka bemanning.
• Redusere overdiagnostisering og overbehandling: Løysingar og tenesteinnovasjon som bidreg til mindre uønskt variasjon i diagnostikk og behandling, gjerne gjennom samarbeid på tvers av nivå i helsetenesta.

Prioriterte pasientgrupper

Helse Vest er særleg opptatt av søknadar som omhandlar dei fem prioriterte pasientgruppene i Nasjonal helse- og samhandlingsplan:

• personar med alvorlege psykiske lidingar og rusmiddelproblem
• barn og unge
• personar med fleire kroniske sjukdommar
• skrøpelege eldre
• svangerskap, fødsel og barseltid

– Vi veit at det skjer mykje godt innovasjonsarbeid i føretaka. Med denne utlysinga håpar vi å bidra til at fleire gode idear blir utvikla vidare og tekne i bruk, seier Mæland.

Les meir om utlysinga av regionale innovasjonsmidlar og korleis du søkjer.