Nytt verktøy for fagpersonar
No er SSA-kunnskapsbanken publisert. Ein digital bank til støtte for fagpersonar i spesialisthelsetenesta som jobbar med vurdering av barn og unge med problematisk eller skadeleg seksuell åtferd mot menneske eller dyr.
Foto: Betanien sykehus
Gjennom åra har det blitt sett inn mange tiltak for betre å kunne hjelpe barna som blir utsett for ulike typar overgrep, men også barn som har utøvd problematisk (PSA) eller skadeleg seksuell åtferd (SSA) har behov for vidare rettleiing, behandling eller annan type hjelp.
SSA-kunnskapsbanken er ein digital kunnskapsbank som primært er utvikla som støtte for fagpersonar tilsett i spesialisthelsetenesta i Noreg.
– Den er laga for fagpersonar som jobbar direkte med vurdering og behandling av barn og ungdom frå 0–17 år, som har utøvd ulike former for problematisk eller skadeleg seksuell åtferd, seier psykologspesialist Monica Jensen ved klinikk for psykisk helsevern på Betanien sykehus.
Tigjengeleg kunnskap
Kunnskapsbanken skal gjere beste kunnskap på fagfeltet lett tilgjengeleg for klinikarar eller fagpersonar. Beste kunnskap inkluderer her både klinisk erfaring, brukarkunnskap og empirisk forsking.
– Denne kunnskapsbanken kan også vere relevant for tilsette i tverrfagleg spesialisert rusbehandling og vaksenhabilitering, og dessutan for helsepersonell tilsett i kommunal, statleg eller privat verksemd, seier Jensen.
Trippelprosjektet SSA
Kunnskapsbanken er utvikla gjennom det nasjonale Trippelprosjektet SSA, der Jensen har fungert som prosjektleiar og Tony Aasen teknisk produsent. Fagpersonar frå heile landet med klinisk- og forskarkompetanse frå barne- og ungdomshabilitering og barne- og ungdomspsykiatrisk avdeling har bidrege i arbeidet.
Bakgrunnen for prosjektet er eit oppdrag frå Helsedirektoratet til Helse Vest, om å føre vidare arbeid som tidlegare låg til spesialisthelsetenesta. Betanien sjukehus leier prosjektet på vegner av Helse Vest.
Trippelprosjektet er delt i tre mål, der det første målet er å opprette ein digital database som kunnskapsbanken.
– No er første mål i prosjektet nådd. Vidare mål er å vurdere data som er samla inn frå klinisk praksis i spesialisthelsetenesta, og så skal vi vurdere om korleis eit kvalitetsregister innan SSA kan bli etablert, seier Jensen.
Prosjektet skal bli sluttført som planlagt innan 1.7.2026.