Val av styremedlemmer blant tilsette i Helse Vest: No kan du foreslå kandidatar
20. januar 2027 er fristen for å velje styremedlemmer til styra i Helse Fonna, Helse Førde, Helse Bergen, Helse Stavanger, Helse Vest IKT AS, Sjukehusapoteka Vest og Helse Vest RHF.
Styremedlemmene blir valde av og blant dei tilsette.
– Vi håper at alle medarbeidarar skal engasjere seg og stemme. Vervet som styremedlem vald av og blant dei tilsette er ei viktig oppgåve, seier Inger Cathrine Bryne, administrerande direktør i Helse Vest RHF.
Styremedlemmene som blir valde, er likeverdige styremedlemmer på linje med dei styremedlemmene som blir oppnemnde av eigar. Dei har òg dei same rettane og ansvaret.
Du skal velje styremedlemmer til to styrer samtidig
Det skal veljast styremedlemmer på to nivå samtidig - både til styret i det regionale helseføretaket, Helse Vest RHF, og til styret i helseføretaket ditt. Vala skjer samtidig, og det er lurt å engasjere seg i begge vala.
Korleis skjer valet?
Valet kan skje på to måtar, enten som forholdstalsval eller som fleirtalsval.
Forholdstalsval er at du stemmer på ei liste med kandidatar, mens fleirtalsval inneber at du stemmer på enkeltkandidatar.
Dersom valet skal skje som forholdstalsval, må lokale fagforeiningar eller andre som har rett til det , sende skriftleg krav om det til valstyret. Krav om forholdstalsval må vere valstyret i hende seinast 9. desember 2026.
Kva skjer no?
Dette er ei kunngjering om valet. Den neste informasjonen som kjem er ei nyheit som forklarer om det blir fleirtalsval eller forholdstalsval.
Kva avgjer om det blir val?
Dersom det blir fleirtalsval, eller det kjem inn meir enn éi liste i samband med forholdstalsval, skal sjølve valet vere hemmeleg og skriftleg. Det vil skje elektronisk. Valmateriell blir gjort tilgjengeleg på intranett i forkant av valet. Siste frist for å stemme er seinast valdagen, som er 20. januar 2027.
Dersom det kjem berre ei liste i samband med forholdstalsva, er valet å anse som ferdig. Då blir dei kandidatane som er føreslåtte på denne eine lista, valde – utan at det blir gjennomført noko meir val.
Kva type val som gjeld i føretaket ditt vil bli kunngjort seinast 23. desember. Denne informasjonen, i tillegg til meir informasjon om sjølve prosessen og reglane, blir lagt ut på denne nettsida og føretaka sine intranett etter kvart.
Kven har stemmerett?
Alle som er tilsett i føretaket på valdagen har stemmerett.
Kven kan føreslå kandidatar eller fremje forslag til eiga liste?
- Ved fleirtalsval kan alle med stemmerett foreslå kandidatane dei ønskjer. Lokale fagforeiningar har også forslagsrett.
- Ved forholdstalsval skal det fremjast forslag til lister. Forslag til lister må vere underteikna av minst seks personar med stemmerett. Ingen kan skrive under på meir enn eitt forslag.
- Lokale fagforeiningar (åleine eller saman med andre lokale fagforeiningar) kan fremje listeforslag ved forholdstalsval. Ei lokal fagforeining kan berre stå bak éi liste.
Valstyra og valforskrifter (Lovdata)
Det er eit valstyre for Helse Vest RHF og eit valstyre for kvart av helseføretaka og Helse Vest IKT AS. Valet skjer etter gjeldande lovar og forskrifter: