Innsatsområde 5: Samarbeid og koordinering
Målbilete: Vi bidreg til og dreg nytte av deling av data i sektoren ved å samarbeide om felles interesser gjennom nasjonale forvaltnings- og samarbeidsstrukturar.

Foto: Colourbox
Nasjonalt samarbeid om informasjonsforvaltning
Helse Vest speler ei viktig rolle i nasjonalt samarbeid om informasjonsforvaltning og deling av data. Vi har klare prosessar og tydeleg ansvarsfordeling som bidreg til sikker og effektiv forvaltning og datadeling på tvers av helseregionar, omsorgsnivå og sektorar.
Etablert samarbeid om felles utfordringar
Vi samarbeider med andre nasjonale og regionale aktørar for å løyse utfordringar knytte til lovverk, leverandørstyring, standardar og felles omgrep. Dette bidreg til felles forståing, enklare datautveksling og betre bruk av nasjonale data.
Helse Vest er aktiv bidragsytar nasjonalt
Helse Vest deltek aktivt i nasjonale samarbeid og påverkar utviklinga av reglar, verktøy og standardar i helsesektoren. Gjennom bidraget vårt påverkar vi eigen situasjon og styrkjer kompetansen vår. Det gir betre ressursbruk og legg til rette for meir strategisk bruk av data på tvers av organisasjonar.
KVA KAN VI GJERE?
- Delta aktivt i nasjonalt samarbeid om informasjonsforvaltning og ta ansvar for enkelte nasjonale initiativ som er i tråd med Helse Vests prioriteringar.
- Etablere interne strukturar som viser kven som har ansvar og kompetanse til å bidra i nasjonale prosessar. Vi må sørgje for at vi har kapasitet til delta der det er viktig at vi bidreg.
- Byggje kompetanse og utveksle erfaringar gjennom å samarbeide med andre regionar. Ta del i nasjonale prosessar for standardisering, lovarbeid, juridiske spørsmål og oppfølging av leverandørar.

NYTTE
Større gjennomslagskraft gjennom samarbeid
Ved å samarbeide med andre aukar vi vår påverknadskraft for endring av lover og løysingar på juridiske problem.
Samarbeid kan også gi styrkt kraft i leverandørstyringa. Helse Vest kan påverke regelverk, verktøy og standardar i helsesektoren ved å delta i nasjonale og internasjonale prosessar. På denne måten kan vi jobbe mot samanhengande helsetenester og sikre tilgang til viktig informasjon.
Leverandørstyring og standardisering er viktig for effektive IKT-tenester.
Døme
Arbeidet med EHDS er ein internasjonal prosess som vil få store konsekvensar for Helse Vest. Gjennom nasjonalt samarbeid kan vi få gjennomslag for endringar som støttar behovet i sektoren. Døme kan vere å få redusert krav som er vanskeleg å innføre eller fører til auka registreringsbelastning for helsepersonell.

RISIKO
Risiko for ineffektiv ressursbruk og forseinka digital transformasjon
Manglande samarbeid om standardar, felles omgrep og grunndata kan føre til dårlegare ressursbruk og forseinke digitaliseringa i helsesektoren. Utan klare rammer for standardisering i fellesskap blir det vanskelegare å dele data og få til samanhengande helsetenester.
Samarbeid med andre regionar og aktørar er nødvendig for å få til denne standardiseringa.
Døme
EPJ-systema, kjernejournal, legemiddellista til pasienten og rettleiarane frå Helsedirektoratet bruker ulike terminologiar, kodeverk og informasjonsmodellar for å beskrive legemiddelreaksjonar. Ulik bruk aukar risikoen for inkonsistente data mellom dei ulike løysingane. Dette gjer det vanskeleg å leggje til rette for effektive, samanhengande løysingar og smidig datadeling.
For å løyse dette krevst samarbeid om bruk og tolking av standardar, terminologi og kodeverk.
Innsatsområde
