Regional plan for tverrfagleg spesialisert rusbehandling (TSB)

Område 2: Identifisering av pasientar i somatiske einingar som har alkohol- eller opiatavhengigheit

Det er eit aukande tal pasientar som blir innlagt i somatikken, som også har ei rusliding. Vellykka behandling av den somatiske lidinga vil ofte ha som føresetnad at også rusproblemet blir adressert for å endre vanar og / eller behandla.

For å kunne gje eit tilbod om rusbehandling i tillegg til behandling for den somatiske sjukdomen, må ein identifisere pasientane som har rusproblem. Alkohol er det dominerande rusmiddelet i Norge, og talet på pasientar som nyttar stadig sterkare opiater er aukande.

Ei somatisk avdeling er ein gunstig arena for å identifisere pasientar som er avhengige av alkohol eller opiater. Det er også ein gunstig arena for å starte behandling. Forsking og erfaring viser at eit godt samarbeid mellom somatiske einingar og einingar som har særleg kompetanse på tverrfagleg spesialisert rusbehandling, har gode føresetnader for å finne denne pasientgruppa, og starte hensiktsmessig behandling.

For å identifisere pasientane skal ein nytte ‘Pragmatisk case-finding’.

Om du vil lese meir om mellom anna rusmiddelbruk og helse i somatiske einingar, kan du ta ein titt i dei vedlagde dokumenta og følgjande lenkjer:

Behandling for avhengighet av smertestillende opioider
Principles for managing OUD related to chronic pain in the Nordic countries based on a structures assessment of current practice
Kraftig økning i bruk av smertestillende opioider
Nasjonal alkoholstrategi (regjeringen.no). På side 46 står tiltaka relatert til spesialisthelsetenesta

Konkrete mål

Somatiske einingar i Helse Vest skal gjennom ‘pragmatisk case-finding’ identifisere pasientar som har eit skadeleg forbruk av alkohol og/eller opiater.
Den generelle kompetansen om skadeleg bruk av alkohol og opiater skal auke i somatiske einingar i Helse Vest. Oppdatert handbok innan rus- og avhengigheitsmedisin (Lommerus) skal vere lett tilgjengeleg på intranett.
Personell med særleg rusmedisinsk kompetanse skal vere tilgjengeleg for somatiske einingar i Helse Vest gjennom til dømes ruskonsulentordning, liason-teneste, vaktordning for lege med rusmedisinsk spesialitet eller rusmedisinsk team.
Når det er behov skal pasientar tilvisast til TSB. For mange av pasientane vil det vere tilstrekkeleg med god informasjon, rettleiing og liknande.

Tiltak for å nå mål

Opplæring av personell i somatiske einingar innan området pragmatisk case-finding
‘Lommerus’ skal bli digitalisert og gjort tilgjengeleg på intranett i løpet av 2021
Alle sjukehus skal ha ordningar som gjer at rusmedisinsk kompetanse er tilgjengeleg for dei somatiske einingane, til dømes ved å ha ruskonsulentordning, liason-teneste, vaktordning for lege med rusmedisinsk spesialitet eller rusmedisinsk team (les meir om temaet i det vedlagde dokumentet)
Alle somatiske einingar skal ha rutinar for samarbeid med rusmedisinsk personell jf. pnkt. 3, både praktisk vedkomande einskildpasientar, men også ordningar for rettleiing og kompetanseheving
Helse Vest RHF vil arbeide for at polikliniske konsultasjonar som ruskonsulentar utfører gir refusjon

Indikatorar på måloppnåing

Tal einingar som har gjennomført opplæring i pragmatisk case-finding
Tal pasientar som blir identifisert med rusdiagnosar i somatiske einingar
Lommerus er digitalisert, og er lett tilgjengeleg på intranett
Rusmedisinsk kompetanse er tilgjengeleg på alle sjukehus
Polikliniske konsultasjonar som ruskonsulentar utfører gir refusjon