Felles regionalt prosjekt for å styrke behandlingstilbodet innan gynekologisk kreft

– Det er god kompetanse innan gynekologisk kreft i regionen, og vi har dyktige fagfolk i alle føretak. Samtidig ser vi at situasjonen er sårbar. No skal vi sette ned ei arbeidsgruppe, og finne gode tiltak for å utvikle tilbodet vidare. Vi er avhengige av at vi framleis har eit tett samarbeid mellom dei gode fagmiljøa i heile regionen, seier Bjørn Egil Vikse, som er fagdirektør i Helse Vest RHF og leiar av prosjektgruppa som no skal i gang. 

Behandlingstilbodet til pasientar med gynekologisk kreft i Helse Vest har i ei årrekkje vore organisert i eit tett samarbeid mellom dei fire helseføretaka i regionen. I 2025 valde Helse Vest RHF, i samråd med dei fire helseføretaka i regionen, å be om ei fagfellevurdering av tilbodet til pasientar med gynekologisk kreft. Fagfellevurderinga slår fast at organiseringa av behandlingstilbodet til pasientar med gynekologisk kreft i Helse Vest slik det er i dag, er sårbart. 

Rapport med fagfellevurdering er klar 

Helse Vest har fått bistand til å gjennomføre den uhilda eksterne fagfellevurderinga, og har nå mottatt rapporten.  

Vurderinga var aktuell etter at Helse Bergen over tid hadde hatt vanskar med å fylle den regionale rolla innan gynekologisk kreft som før, på grunn av mangel på nøkkelpersonell. I tillegg var det publisert ny nasjonal kreftstrategi og kvinnehelsestrategi. Nasjonale kvalitetsindikatorar viste også at det kunne vere potensiale for forbetring av tilbodet i regionen. 

– Vi meiner at vi har fått ei god fagfellevurdering, og vi vil ta rapporten med som del av eit større grunnlag, når vi skal gjere eit regionalt arbeid vidare. Vi skal finne tiltak som sikrar eit godt, berekraftig og likeverdig tilbod innan gynekologisk kreftbehandling, med utgangspunkt i heile regionen på Vestlandet, seier Vikse. 

Viktig med kompetanse i heile regionen 

Det regionale samarbeidet har vore heilt sentralt for tilbodet dei siste åra, også som støtte til Helse Bergen i den regionale rolla.  

– Det er heilt sentralt med kompetanse på heile Vestlandet, og det er viktige bidrag til pasientbehandlinga frå andre sjukehus i regionen, spesielt Helse Stavanger, seier fagdirektør Vikse og fortsett: 

– Helse Bergen har rekruttert nye, erfarne fagpersonar og sett i verk tiltak. Samtidig er det framleis behov for å styrke tilbodet ytterlegare. Fagfellevurderinga foreslår fleire tiltak for å gjere tilbodet mindre sårbart, både innan den kirurgiske og medikamentelle behandlinga. På same tid framhevar rapporten kor viktig det er å bevare dagens praksis, der mest mogleg av utredning og behandling skjer nærast mogleg der pasienten bur. 

Dette er mandatet for vidare arbeid 

Prosjektet som startar no, skal gjere ein gjennomgang av organiseringa av tilbodet for gynekologisk kreftbehandling i regionen, og vurdere tiltak. Tidlegare styrevedtak og nasjonale føringar om organisering av tilbodet skal leggast til grunn for arbeidet, saman med den eksterne fagfellevurderinga.  

Arbeidsgruppa, med leiing av Helse Vest RHF, har deltakarar frå dei fire sjukehusføretaka i Helse Vest, tillitsvalde, vernetesta og brukarrepresentantar. Arbeidsgruppa skal 

• vurdere tiltak som kan innførast på kort og lang sikt, for å styrka tilbodet for gynekologisk kreftbehandling i regionen. 

• vurdere andre forhold som det bør takast omsyn til i gjennomgangen. 

• foreslå ein overordna regional handlingsplan for når tiltaka skal setjast i verk og ansvarlege for tiltaka. 

Arbeidsgruppa skal levere ein samla rapport med vurderingar og forslag. Rapporten blir lagt fram for styra i helseføretaka i regionen og Helse Vest RHF tidleg på hausten 2026.

• Les styresaka som skal opp i Helse Vest RHF-styret 11. mars.
• Les heile fagfellevurderinga.
• Les mandatet for prosjektet.