Regional rapport om gynekologisk kreft er klar

– Helse Vest RHF ønsker å styrke behandlingstilbodet innan gynekologisk kreft på Vestlandet gjennom godt samarbeid mellom helseføretaka i regionen. Vårt ansvar som regionalt helseføretak er å sørgje for at dette fungerer regionalt på både kort og lang sikt, det vil seie minst 10 til 15 år fram i tid, seier Bjørn Egil Vikse, fagdirektør i Helse Vest RHF. 

Det var fleire forhold som gjorde at det i 2025 vart starta eit felles regionalt arbeid innan gynekologisk kreft. Helse Bergen hadde i ein periode i 2024 vanskar med å fylle den regionale rolla innan gynekologisk kreft på same måte som tidlegare, i tillegg til at det kom ein ny nasjonal kreftstrategi, ny kvinnehelsestrategi og det kom kvalitetsresultat som viste forbetringspotensiale.  

God kompetanse, men små fagmiljø

I samråd med dei fire helseføretaka i regionen fekk Helse Vest RHF utført ei ekstern fagfellevurdering av tilbodet innan gynekologisk kreft i regionen. Fagfellevurderinga slår fast at organiseringa av behandlingstilbodet til pasientar med gynekologisk kreft i Helse slik det er i dag, er sårbart. 

– Det er god kompetanse innan gynekologisk kreft i regionen, men fagmiljøa er små, og det er behov for å gjere dei meir robuste, fortset Vikse. 

Foto: Helse Vest RHF / Jan Inge Haga

Viktige diskusjonar  

I løpet av våren har fagfolk i sjukehusa og Helse Vest RHF, saman med brukarrepresentantar, tillitsvalde og verneteneste, vurdert aktuelle tiltak og framtidige modellar for organisering av tilbodet i regionen. No er rapporten ferdig, og sendt til sjukehusføretaka for behandling i styra der, som innspel til Helse Vest RHF. Til slutt skal styret i Helse Vest RHF ta ei avgjerd i styremøtet til hausten. Det har vore gode og viktige diskusjonar internt i prosjektgruppa.  

Prosjektet har vurdert fem ulike modellar for organisering av gynekologisk kreftbehandling i Helse Vest, med ulike fordelar, ulemper, risiko og kva som må til for å lykkast, på kort og på lang sikt.  

– Det er semje og ein felles forståing blant alle helseføretaka om svært mange av tiltaka som blir anbefalt. Det har vore viktige diskusjonar i gruppa, blant anna om lokalisering av tilbod. Det er uvisse og usemje om kva som på sikt vil gi det beste og mest stabile tilbodet og korleis funksjonar bør fordelast i regionen, spesielt mellom Bergen og Stavanger. Helse Vest RHF vil nå be helseføretaka om innspel på rapporten i forbindelse med at det blir planlagd for ei sak til styret i Helse Vest RHF til styremøtet 22.oktober, seier Vikse. 

• Les rapporten frå prosjektgruppa (per juni 2026) 
  

• Les heile fagfellevurderinga (per mars 26) 

• Les mandatet for prosjektet, og styresaka som var oppe i Helse Vest RHF-styret 11. mars. 

Tidlegare nyheitssaker:

• Felles regionalt prosjekt for å styrke behandlingstilbodet innan gynekologisk kreft - Helse Vest RHF
• Skal få råd om utviklinga av behandlingstilbodet innan gynekologisk kreft - Helse Vest RHF