Vi tilrår at du alltid nyttar siste versjon av nettlesaren din.

Regional utviklingsplan: Slik gir du innspel til planen

Ei berekraftig og samanhengande spesialisthelseteneste med høg kvalitet, der ressursane går til det beste for pasientane. Det er ambisjonen for den nye regionale utviklingsplanen, som blir revidert denne våren.

Publisert 18.05.2026

Saka oppsummert

  • Helse Vest reviderer den regionale utviklingsplanen, som skal styre utviklinga av spesialisthelsetenesta på vestlandet dei neste 15 åra.
  • Målet er gode, samanhengande og berekraftige helsetenester, der ressursane blir brukt best mogleg for pasientane.
  • I revisjonen blir det meir vekt på beredskap, berekraft, bygg, digitalisering og betre bruk av ressursar.
  • Planen kjem på høyring i september 2026, og alle kan sende inn innspel i ein periode på seks veker.

 

Den regionale utviklingsplanen er øvste strategiske dokumentet i regionen i vest.  

– Vi skal legge til rette for at sjukehusa skal kunne levere gode helsetenester til alle, på tvers av alder, kjønn, økonomi og kulturell bakgrunn, også dei neste 15 til 20 åra. Da treng vi ein god plan som peiker retninga og som vi kan styre etter, seier Inger Cathrine Bryne, administrerande direktør i Helse Vest RHF, og fortset: 

Dame med briller står ute og ser mot kamera

Foto: Helse Vest RHF / Jan Inge Haga

Inger Cathrine Bryne er administrerande direktør i Helse Vest RHF.

 

– Prioritering er ein føresetnad for å gi gode og likeverdige helsetenester. Ressursane skal fordelast på ein open og rettferdig måte. Dei må brukast der dei gir størst verdi for pasientane.  

Ho understrekar at det er fleire forhald som har endra seg sidan siste revisjon av planane i 2022:  

– Vi må styrke beredskapen, samtidig som fleire skal få raskare tilgang til helsetenesta. Vi skal også få høgare fart på digitalisering og ta løysingane i bruk på ein betre måte. Berekraft står heilt sentralt. Det går på å behalde og rekruttere medarbeidarar, men også miljøansvaret vårt. Vi skal vere ein samanhengande helseteneste, der pasienten si stemme blir høyrt. 

Kva blir nytt i denne revisjonen?  

Fleire forhald har endra seg sidan førre oppdatering i 2022, og desse vil få større plass i årets revisjon:   

  • Beredskap må tenkast på nytt.  
  • Berekraft blir stadig viktigare.  
  • Forvaltning av bygg er eit sentralt område. 
  • Betre bruk av ressursane, og mindre plunder og heft for medarbeidarar er avgjerande.  

Slik blir det jobba med planen  

Helse Vest RHF går gjennom og oppdaterer den eksisterande regionale utviklingsplanen. Utviklingsplanane til helseføretaka blir oppdatert parallelt med den regionale planen. Dei fire regionale helseføretaka samarbeider tett, for å dele både utfordringar og løysingar.   

Tidsplanen vidare  

  1. Styret i Helse Vest RHF behandlar høyringsutkast i styremøtet 8. september.
  2. Regional utviklingsplan blir send på høyring i perioden september og oktober.
  3. Revidert versjon av Regional utviklingsplan for Helse Vest RHF blir behandla i styret i Helse Vest RHF i desember 2026. 

Har du innspel til revisjonen?  

Frå cirka 10. september vil planen ligge ute til høyring og innspel frå alle interesserte, i seks veker. 

Skriftlege innspel til planen kan sendast til Tanja R. Birkenfeldt (tanja.rajic.birkenfeldt@helse-vest.no). Vi er interesserte i alle type innspel.