Regionalt brukarutval: Her er dei viktigaste sakene framover
Pasienttryggleik, gode prioriteringar og meir kunnskap til pasientar og pårørande er blant dei viktigaste sakene for Regionalt brukarutval i Helse Vest hausten 2026.
Foto: Jorunn Busk, Helse Vest RHF
Saka oppsummert
- I haust vil Regionalt brukarutval (RBU) blant anna jobbe med pasienttryggleik, gode prioriteringar og tiltak som styrkjer helsekompetansen til pasientar og pårørande.
- RBU er glade for at det er etablert ei ny regional teneste for helsekompetanse og meistring i Helse Fonna.
- RBU vil halde fram arbeidet med å redusere ventetider og sikre at erfaringar frå pasientar og pårørande blir brukte meir systematisk i forbetringsarbeid.
- Strammare økonomi, mangel på helsepersonell og auka beredskapsbehov gjer at helseføretaka må prioritere tydelegare, unngå overbehandling og styrkje brukarmedverknaden.
– Vi har hatt mange viktige saker oppe det første halvåret. Pasienttryggleik og prioritering ligg til grunn for alt vi gjer. Vi har óg jobba mykje med helsekompetanse, meistring og læring. Andre viktige tema er overbehandling, ventetider, systematisk bruk av pasienterfaringar, sikkerheitspsykiatri, digitalisering og beredskap, seier Atle Lunde, leiar av regionalt brukarutval (RBU) i Helse Vest RHF.
RBU gir råd til styret og administrerande direktør i Helse Vest RHF i saker som gjeld tilbodet til pasientar og pårørande.
- Vil du lese meir detaljert om kva RBU har gjort det siste året? Gå til årleg melding for brukarutvalet i 2025.
Ny regional teneste for helsekompetanse og meistring
Regional kompetanseteneste for helsekompetanse og meistring i Helse Vest blir no etablert i Helse Fonna. Brukarutvalet har arbeidd lenge for å få på plass ei slik teneste.
– Vi er veldig glade for at det er løyvd seks millionar kroner til dette arbeidet. God informasjon og dialog er avgjerande for at pasientane skal kunne ta gode val og meistre sin eigen situasjon. Det kan gi betre livskvalitet, større tryggleik og færre reinnleggingar, fortset Lunde.
Ventelister og pasienterfaringar viktig framover
I 2025 har brukarutvalet hatt særleg merksemd på ventelister og ventetider til operasjon. Utvalet ønskjer óg at erfaringane til pasientar og pårørande blir brukte meir systematisk i forbetringsarbeidet.
– Vi må lære av gode erfaringar, både lokalt og nasjonalt. Det blir særleg viktig når vi må prioritere hardare, seier Lunde.
Berekraft, beredskap og behandling
Færre helsearbeidarar, strammare økonomi og større behov for beredskap krev tydelege prioriteringar.
– Når vi seier ja til noko, må vi seie nei til noko anna. Vi må unngå overbehandling og ha ein tydeleg plan for brukarmedverknad, særleg i samhandlinga med primærhelsetenesta, avsluttar Lunde.
Nytt medlem i 2026
Joyce Kamara frå Vestland innvandrerråd er nytt medlem frå 2026 i brukarutvalet.
Dette er medlemmene i Regionalt brukarutval i Helse Vest hausten 26: Brukarmedverknad - Helse Vest RHF