Her finn du ledige stillingar
Sjå video om korleis det er å jobbe her:
Lurar på du på korleis det er å jobbe hos oss? Kristian Bernhoff Frafjord er leiar på lønns- og rekneskapssenteret, og her kan du sjå kva han seier om Helse Vest RHF: Video her
Dette er Helse Vest RHF, sjukehusa, SAV og Helse Vest IKT
- Helse Vest regionale helseføretak (Helse Vest RHF) eig fem helseføretak; Helse Bergen, Helse Stavanger, Helse Fonna, Helse Førde og Sjukehusapoteka Vest, og eitt aksjeselskap - Helse Vest IKT - i Rogaland og Vestland.
- I Helse Vest RHF jobbar det om lag 70 til 80 medarbeidarar. Vi held til i Stavanger sentrum. Her finn du blant anna rådgivarar med medisinskfagleg bakgrunn, juristar, økonomar, samfunnsvitarar, personalrådgivarar, kommunikasjonsrådgivarar, lønn- og rekneskapspersonell, sekretærar og leiinga.
- Dei største sjukehusa på Vestlandet er Førde sentralsjukehus, Haukeland universitetssjukehus, Haugesund sjukehus og Stavanger universitetssjukehus. Føretaka våre har mange spennande, ledige stillingar.
- I sjukehusa på Vestlandet er det eit mangfald av jobbar, blant anna innanfor helsefag, IKT, kokkefag, leiing og ingeniørfag. Det finst om lag 130 ulike yrkesgruppar på sjukehusa.
- Det er mye utdanning du kan ta i samanheng med jobben. Det er både utdanning på vidaregåande nivå - som lærlingar, og utdanning på høgskule- og universitetsnivå, slik som bachelor- og mastergrad, profesjonsutdanningar og spesialiseringar i sjukehusa.
Sjå kva nokon av våre medarbeidarar jobbar med
-
Brita Mauritzen Næss
Seniorrådgivar
🌱 Dette er Brita Mauritzen Næss! Ho koordinerer Helse Vest sine aktivitetar på området som heiter samfunnsansvar. Dette inneber mellom anna overordna mål for å redusere CO2-utslepp, å førebygge korrupsjon og å ta vare på menneskerettar og anstendige arbeidsforhold i leverandørkjeda.
– Leiinga vår er gode på å løfte fram desse områda, blant anna ved at dei har satt felles overordna klima- og miljømål. Det gjer dette arbeidet givande og konstruktivt, seier ho.
Det er særleg tre store saker som fyllar Britas dagar no:
🌍 Integrere rapporten frå naturrisikoutvalet «I samspel med naturen» i arbeidet vårt, med mål om å betre ta vare på naturen rundt oss
🌎 Ferdigstille årets utgreiing for korleis vi tek vare på menneskerettar og anstendige arbeidsforhold
🌏 Lage klar rapporten som presenterer klimarekneskapen for 2023. Nytt i år er at vi presenterer rekneskap for heile vår verksemd, både eigne utslepp og utsleppa knytt til forbruk av alle varer og tenester
🌻 Spesialisthelsetenesta forvaltar store ressursar på vegner av fellesskapet, og vi har ei plikt overfor samfunnet i stort å forvalte desse ressursane på ein berekraftig måte.
🌼 Da er det viktig å ha engasjerte folk som Brita med på laget! -
Gjertrud Jacobsen
😀 Gjertrud Jacobsen er fagleiar her i Helse Vest RHF. Ho er mellom anna leiar for det som så kort og fint blir kalla «RHF-enes servicemiljø for nasjonale tjenester, nettverk og sentre».
⁉ Men kva er det, då?
🏥 Det fins to ulike typer tenester. Nasjonale behandlingstenester er høgspesialisert behandling som er lagt til eitt eller to sjukehus i Noreg.
Det er viktig for dei regionale helseføretaka å sørgje for at pasientar frå alle regionar som kan trenge slik behandling, får likeverdig tilgang til desse tenestene.
Eit døme frå vest er brannskadeavdelinga på Haukeland universitetssjukehus. Denne avdelinga har landsdekkande funksjon for behandling av pasientar i alle aldersgrupper med store brannskadar, brannskadar som krev spesiell ekspertise og andre definerte tilstandar.
✅ Nasjonale kompetansetenester skal sikre kompetanseoppbygging innanfor eit spesifisert fagområde. Det skal sikrast at alle som skal ha det, har tilgang til denne kompetansen, og at han blir teke i bruk av helsetenesta i heile landet.
Eit døme her er Nasjonal kompetanseteneste for flåttborne sjukdommar. Tenesta er etablert for å byggje opp og spreie kompetanse om utgreiing og behandling av flåttborne sjukdommar.
Dei fire regionale helseføretaka i Noreg har i fellesskap ansvar for nasjonale kompetansetenester, og nasjonale behandlingstenester. Servicemiljøet til RHF-a skal følgje opp desse, og bidra til at alle regionar har nytte av dei.
😉 Enkelt og greitt. Godt vi har dyktige Gjertrud hos oss!
vierRHF -
Lars Øhlckers
Assisterande fagdirektør
🙂 Før sommaren 2024 avslutta Lars Øhlckers eit vikariat i fagavdelinga her hos oss. Det er svært gledeleg å fortelje at han på nyåret kommer tilbake, men no som assisterande fagdirektør med spesialisering innan tverrfagleg spesialisert rusbehandling og psykisk helsevern.
– Eg søkte denne rolla fordi eg ønskjer å bidra til å vidareutvikle tenestene innan psykisk helse, rus og habilitering for befolkninga i regionen vår, seier Øhlckers.
🙋 Øhlckers lèt seg fascinere av fagfeltet.
– Det spenner seg frå det aller mest private i kvar enkelt av oss, til dei store utviklingstrekka i samfunnet. Det er eit fagfelt som påskjønner nysgjerrigheit, og det liker eg veldig godt. Også er det enormt komplekst – du blir aldri utlærd, og du forstår noko nytt stort sett kvar einaste dag.
👍 Fagdirektør Bjørn Egil Vikse er glad for at Øhlckers har takka ja til stillinga og vil fortsette arbeidet med å styrke spesialisthelsetenestene i regionen frå ei rolle hos oss i det regionale helseføretaket.
– Psykisk helsevern og rus er eitt av satsingsområda våre, og med Lars Øhlckers’ lange fartstid frå fagfeltet blir erfaringa hans blir svært verdifull i dette arbeidet. Han er ein kunnskapsrik og dyktig person som eg har tillit til at vil gjere ein solid jobb i denne rolla.
😄 Vi ser fram til å få deg tilbake!
vierRHF -
Bogdana Bakken
⭐ Bogdana Bakken har master i matematikk og fysikk med spesialisering i statistikk. Prøv å seie det fort tre gonger! Ho er leiar i avdelinga for medarbeidar, organisasjon og teknologi hos oss.
– Eg utviklar analysar og kunnskapsgrunnlag på tvers av regionen til leiarar og medarbeidarar i Helse Vest. Dette gir god innsikt i faktagrunnlag og dekkjer behovet for styringsinformasjon og rapportering på ulike nivå, forklarer ho.
🧑🎓 Siste året av masterstudiet på Universitetet i Stavanger fekk ho tilbod om å skrive masteroppgåve med rettleiing frå bioingeniørar ved Stavanger universitetssjukehus.
– Det var då eg skjønte korleis matematikk og statistikk kan brukast i praksis i helsebransjen, at det ikkje berre er legar og sjukepleiarar som jobbar med helse, seier ho.
Dette året har ho fullført regionalt toppleiarprogram i Helse Vest.
– Dette var veldig nyttig og spennande! Eg fekk meir innsikt i kvardagen til dei som jobbar i sjukehusa, og det har gitt meg eit nytt blikk på korleis vi i analyseteamet kan laga endå betre rapportar og kunnskapsgrunnlag.
🩰 I barne- og ungdomsåra i heimlandet Ukraina var ho i profesjonell dansesport, men no dansar ho mest for gøy. Reise er ein annan lidenskap, og håpet er at ho snart kan ta med den vesle dotter si til heimbyen i Ukraina.
Vi er heldige som har slike skarpe hjerner med på laget!
vierRHF -
Anja Scheuner
📞 Når du ringjer til Helse Vest RHF eller kjem til kontora våre, er det ofte Anja Scheuner du snakkar med. Vår alltid vennlege, serviceinnstilte og imøtekommande administrasjonssekretær.
– Eg søkte ei ledig administrasjonsstilling i Helse Vest for omtrent 2,5 år sidan, og overtydde alle om at eg med min lange erfaring og gode kompetanse var den beste blant 100 søkjarar, seier Anja med glimt i auget.
✨ Det er godt jobba! Men Anja er heller ikkje den arbeidssky typen.
Opphavleg frå Tyskland, lærte ho seg norsk på kveldskurs i løpet av fem månader, medan ho tok yrkesutdanning som advokatsekretær og bachelor i sosialøkonomi. Dagen etter at Anja hadde levert bacheloroppgåva i 2013 flytta ho til Noreg.
😃 Ho har mange års erfaring frå kontor- og administrasjonsarbeid frå ulike yrkesgrupper, og det kjem godt med i kvardagen i Helse Vest.
– Tida mi i Helse Vest så langt har vore spennande og lærerik. Det var mykje å setje seg inn i, og det er det framleis. Hjula står aldri stille. Eg trivst kjempegodt her, med mange kjekke og engasjerte kollegaer rundt meg, seier ho.
💃 Men Anja er ikkje ferdig, og satt nyleg i gang med ei mastergrad i digitalisering. Når den er i boks vil ho vere godt rusta for å gjennomføre og leie tiltak for digitalisering i både private og offentlege verksemder.
Her er det berre å henge med i svingane for oss andre! 😊
👏 Heia deg, Anja!
vierRHF -
Knut Harboe
Klinisk IKT-leiar
😎 «I'm a nerd and proud of it», seier Knut Harboe. Kvar måndag er han ortoped med poliklinikk og operasjonar. Resten av tida er han Helse Vest RHF sin nye kliniske IKT-leiar i området som heiter pasientbehandling.
🤔 Men kva er det, då? Kort fortalt er Harboes rolle å finne ut kva legar og sjukepleiarar treng at IKT-verktøya inneheld for at dei skal gjere ein god jobb, og omsetje dette til ingeniørspråk. Når verktøya er utarbeidde, skal Harboe prøve å formidle tilbake frå ingeniørane kva som fungerte og ikkje, til klinikarspråk.
✔ – Eg ville ikkje sitje som ein papirpamp og meine noko om dette, så derfor har eg den eine dagen i veka i klinikk der eg sjølv bruker IKT-verktøya i praktisk arbeid, forklarer han.
👨⚕️ Mange kjenner kanskje Harboe frå Stavanger universitetssjukehus, der han har vore sjef både på ortopedisk- og anestesiavdelinga. Han er utdanna dataingeniør og ortoped, og medan han arbeida med å bli ortoped og ta doktorgrad utvikla han operasjonsplanleggingssystemet Helse Stavanger brukte i mange år.
❣ – Eg er glad i det tekniske, og er stolt av å vere nerd. Denne stillinga klødde nerdegenet mitt ganske kraftig, for det opnar for moglegheit til å gjere det eg synest er kjekkast som leiar: Å gjere arbeidskvardagen til folk betre.
🖥 Målet hans er at helsepersonell skal sleppe irriterande dobbeltarbeid, få ein arbeidskvardag utan digitale fartshumpar – og meir tid til pasientane. Vi gler oss til å følgje dette vidare! -
Beredskapsteamet
😎 Dette er beredskapsteamet vårt!
💪 Ved både store og små hendingar er det svært viktig at både sjukehusa våre, Helse Vest IKT og Sjukehusapoteka Vest HF er godt førebudde.
🌪 Thomas Iversen, Maren Helen Moi-Vist, Ingeborg Aas Ersdal og Kristin Grødem arbeider med beredskapsoppdrag frå nasjonale styresmakter gjennom heile året. Dei sørgjer for å utarbeide og halde ved like regionalt og internt beredskapsplanverk, i tillegg til sikkerheitsorganisering. Dei bidreg rett og slett til å gjere spesialisthelsetenesta på Vestlandet i stand til å handtere alt frå IKT-angrep, til ekstremvêr, ulykker, kriser og krig.
🙂 Behovet for koordinering av beredskapsarbeid både internt, regionalt, interregionalt og nasjonalt aukar. Det gjer også omfanget av både oppgåver og forventningar til beredskaps- og sikkerheitsarbeid.
👍 Teamet fungerer som støtte for beredskapsleiinga under hendingar, og samarbeider tett med beredskapskontaktane i sjukehusa, Helse Vest IKT og Sjukehusapoteka Vest.
🙌 Andre dei samarbeider med er Forsvaret, statsforvaltarar og nasjonale styresmakter, om ulike former for beredskaps- og sikkerheitsarbeid.
Øvinga Nordic Response er døme på dette, der Helse Vest sende eit kirurgisk team til Alta for å øve på å hjelpe kvarandre på tvers av helseregionar ved store ulykker.