Ny stipendordning for klinikere
Overlege og forskar Hanna Dillekås ved Kreftklinikken på Haukeland universitetssjukehus, har fått tildelt Helse Vests stipend til kliniske studiar for eit tverrfagleg forskingsprosjekt i samarbeid mellom Pet-senteret, BDS og Kreftklinikken, der ho leier den kliniske behandlingsdelen. I prosjektet blir kombinert avansert biletteknologi med målretta og personleg tilpassa behandling av brystkreft.
Stipend som gir rom for nytenking
Helse Vest har etablert to stipendordningar for å fremje klinisk forsking. Stipendet Hanna Dillekås har fått, er spesielt retta mot helsepersonell med doktorgrad som ikkje har hatt høve til å vere aktive forskarar. Stipendet gir støtte til lønnsmidlar tilsvarande 20 % postdoktorstilling.
– Det er eit viktig tiltak for å få klinikarar tilbake i forskinga. Vi har verdifull innsikt frå pasientbehandling, og den kunnskapen er nyttig i forskingsmiljøa, seier Dillekås.
Helse Vest deler også ut stipend retta mot forskarar med doktorgrad og postdoktorerfaring, som er tilsett i minst 50 % klinisk eller paraklinisk stilling ved helseføretak eller ideelle institusjonar i regionen.
Stipend til klinikere
Søknadsfrist for stipenda er 15. September. Meir informasjon finst på Helse Vests nettsider:
- Stipend til kliniske *studiar (20 prosent) skal bidra til å rekruttere nye forskarar som i mindre grad har vore involverte i forsking etter fullført doktorgrad.
- Kliniske forskarstipend har som formål å vidareutvikle og forsterke forskingsaktiviteten hos klinikarar med etablert forskingskompetanse.
Frå klinikk til forsking
– Målet er å gi pasientane best mogleg, persontilpassa behandling, seier Dillekås, som er onkolog med lang erfaring frå behandling av brystkreftpasientar. Takka vere stipendet frå Helse Vest, som har som mål å styrkje klinisk forsking i regionen, får ho no frigjort 20 prosent av arbeidstida til å fordjupe seg i nettopp dette forskingsområdet.
– Tidlegare har eg måtta bruke meir av fritida til forsking. No får eg høve til å gjere det som ein del av jobben. Det gir både betre forskingskvalitet og ein meir berekraftig arbeidskvardag, seier ho.
Meir kliniske studier
Direktør for kreftavdelinga, Oddbjørn Straume, fortel at det har komme sterke føringar frå nasjonale og regionale helsestyresmakter om at det er eit ønske om meir klinisk forsking og særleg kliniske studiar. Også pasientforeiningane og brukarane signaliserer at klinisk forsking må styrkjast.
– Tida då helsearbeidarar gjorde forsking på kveldstid og helg er over, og dette var eigentleg aldri verken berekraftig eller inkluderande. Eg har tru på at kvaliteten på den kliniske forskinga blir betre av at det blir ein integrert del av jobben i klinikkane. Kliniske stipend, som det Hanna har fått, gir moglegheit for frikjøp til forsking i arbeidstida er gode tiltak for å auke kvalitet og kvantitet av klinisk forsking, seier Straume.
Teknologi som kan endre behandlingsløpet
Prosjektet, der Dillekås leier den kliniske behandlingsdelen, tek i bruk Pet-MR-teknologi – ein kombinasjon av to avanserte biletformer. PET viser biologisk aktivitet i kroppen, medan MR gir detaljerte anatomiske bilete. Saman gir dei eit unikt innblikk i korleis kreftsvulstar reagerer på behandling.
– Vi undersøkjer korleis pasientar responderer på *neoadjuvant behandling, altså behandling før operasjon. Målet er å kunne føreseie kven som har god effekt, betre enn med dagens verktøy, slik at vi kan tilpasse behandlinga betre til kvar enkelt, forklarer ho.
Mot meir presis og persontilpassa kreftbehandling
Dillekås håpar prosjektet kan bidra til ei framtid der brystkreftbehandling er meir målretta og effektiv.
– Vi har komme langt, men vi kan bli endå betre. Ved å forstå korleis behandlinga verkar på kvar enkelt pasient, kan vi skreddarsy behandlingsløp som gir best mogleg resultat, og minst mogleg biverknader, seier ho.
Ho oppmodar fleire klinikarar til å søkje stipend og engasjere seg i forsking:
– Det gir fagleg påfyll, nye perspektiv – og ikkje minst moglegheita til å bidra til betre behandling for pasientane våre.