Vi tilrår at du alltid nyttar siste versjon av nettlesaren din.

Regionalt brukarutval i Helse Vest: – Gleder meg til å ta fatt på viktig arbeid

Seks nye og fire attvalde medlemmer skal gi pasientar, brukarar og pårørande ei tydeleg stemme i Helse Vest. Linda Haugland blir leiar av det regionale brukarutvalet (RBU) frå 1. januar 2027.

Publisert 12.11.2026

Saka oppsummert

  • Frå 2027 består det regionale brukarutvalet av seks nye og fire attvalde medlemmer.
  • Linda Haugland blir leiar, og Arne Hovland blir nestleiar frå 1. januar 2027.
  • Utvalet skal gi råd til styret og administrerande direktør i saker som gjeld pasientar, brukarar og pårørande.
  • Medlemmene representerer ulike fagområde, geografiske område, aldersgrupper og bakgrunnar.

 

– Eg gleder meg til å ta fatt på dette viktige arbeidet. Brukarutvalet skal løfte fram erfaringane og synspunkta til pasientar, brukarar og pårørande. Eg vil bygge vidare på den gode jobben som allereie er gjort, og bidra til at brukarstemma blir høyrd når viktige avgjerder blir tatt, seier den nye leiaren Linda Haugland. 

RBU gir råd til styret og administrerande direktør i Helse Vest RHF  i saker som gjeld tilbodet til  pasientar og pårørande. Utvalet oppnemnast for to år av gangen, skal representere heile regionen og ulike delar av spesialisthelsetenesta. Saka vart behandla i styret i Helse Vest RHF 11. november. 

 

Foto: Jorunn Busk, Helse Vest RHF

Linda Haugland er ny leiar for det regionale brukarutvalet frå 1. januar 2027.

Ein viktig samarbeidspartner 

Medlemmene har erfaring frå somatikk, psykisk helsevern og rusbehandling. Det er og lagt vekt på geografisk spreiing, alder, kjønn og kulturelt mangfald. Ny nestleiar blir Arne Hovland. 

– Gode helsetenester skal bli utvikla saman med dei som bruker dei. Derfor er brukarutvalet ein viktig samarbeidspartnar for både styret og administrasjonen. Brukarutvalet gir oss verdifull innsikt i korleis tenestene blir opplevde – på systemnivå, seier Inger Cathrine Bryne, administrerande direktør i Helse Vest RHF.  

Her er det nye brukarutvalet:  

  • Linda Haugland (FFO Vestland) – attval  
  • Cathrine Lie Wathne (FFO Rogaland) – ny  
  • Liv Sonja Flolid (FFO Rogaland) – ny  
  • Hege Kornberg Christensen (SAFO SørVest) – attval  
  • Arvid Åsen (Kreftforeningen) – ny 
  •  Anne-Pia T. Lystrup (RIO) – attval  
  • Tor-Johnny Agledal (FFO Vestland) – attval  
  • Arne Hovland (FFO Vestland) – ny  
  • Everline Konyo Mjømen (FFO Vestland) – ny  
  • Arne-Christian Mohn (Pensjonistforbundet Rogaland) – ny