Systematisk bruk av pasientrapporterte data, tett involvering av brukarrepresentantar og styrkt samarbeid med pasient- og brukarorganisasjonar er avgjerande for å utvikle berekraftige og likeverdige helsetenester.
Helse Vest vil prioritere...
...styrke fagleg samarbeid gjennom nettverk og standardiserte arbeidsmetodar i og mellom sjukehus
...styrke samhandling med kommunane gjennom helsefellesskap for å prioritere, fordele oppgåver og sikre rett behandling på rett nivå
...ta raskare i bruk nye løysingar som sikrar trygg og effektiv digital informasjonsdeling på tvers av nivå og sektor
...vidareutvikle avtalespesialistordninga for å møte aukande behov for spesialisthelsetenester
...nytte kapasiteten hos private og ideelle aktørar meir målretta for å redusere ventetider
Fram mot 2042
Det er tydeleg regional oppgåvedeling med god balanse mellom høg spesialisering og tenester nær der pasientane bur. Fleire tenester blir leverte heimebasert og digitalt, og samhandlinga mellom spesialisthelsetenesta og kommunane er tett integrert.
Private og ideelle aktørar er ein del av ei samla helseteneste. Deling av data og felles strukturar understøttar innovasjon, forsking og kontinuerleg forbetring. Ressursane blir nytta berekraftig gjennom samhandling, prioritering og kloke val.
Bakgrunn
Helsetenestene har høg kvalitet, men samhandlinga er ikkje god nok. Pasientar med samansette behov opplever fragmenterte forløp, og mangelfull informasjonsdeling kan svekke kvalitet, pasienttryggleik og ressursbruk.
Det er behov for tettare koordinering mellom fagområde, sjukehus og nivå i tenesta, inkludert betre samspel mellom psykisk helsevern og somatikk. Samtidig må balansen mellom spesialisering og desentralisering vidareutviklast gjennom tett samarbeid i regionen.
Avtalespesialistar og private aktørar er viktige, men potensialet er ikkje fullt utnytta. Samhandlinga med kommunane fungerer på mange område godt, men vil krevje meir systematisk samarbeid framover, særleg for pasientar med langvarige og samansette behov.
Dagens digitale løysingar støttar ikkje godt nok informasjonsdeling og felles planlegging. Meir effektive arbeidsmåtar, betre digitale løysingar og sterkare datadeling er nødvendig for å sikre samanhengande tenester.
Framtidsbildet
Stabilt og trygt samarbeid mellom spesialisthelsetenesta, kommunar og private aktørar gir samanhengande og koordinerte tenester. Standardiserte pasientforløp, god informasjonsflyt og digitale løysingar bind tenestene saman, også på tvers av sektorar.
Klok bruk av ressursar bidrar til at fleire pasientar får trygg og koordinert behandling.