Mål 1

Fram mot 2041 skal pasientane møte ei spesialisthelseteneste som prioriterer dei med størst behov og alvorleg tilstand. Pasientane skal få rask tilgang til utgreiing, behandling og oppfølging med dokumentert effekt.

Uønskt variasjon skal reduserast. Pasienttryggleiken skal styrkjast. Kvalitetsdata, pasientrapporterte data og pasient- og brukarerfaringar skal brukast meir systematisk i læring, prioritering og forbetring.

Pasientar med samansette, langvarige, kroniske eller sjeldne tilstandar skal få meir heilskaplege og tverrfaglege tilbod. Førebygging, tidleg innsats, god informasjon, relevant opplæring og støtte til meistring skal bidra til å hindre forverring og gi betre livskvalitet.

Digitale og fysiske tenester skal vere tilgjengelege og universelt utforma. Tenestene skal ta omsyn til at pasientar har ulik helsekompetanse, ulik digital kompetanse og ulike føresetnader for å delta aktivt i eiga behandling.

Medisinsk utvikling, forsking, innovasjon og teknologi skal takast i bruk der dette gir betre kvalitet, betre pasienttryggleik eller meir berekraftig ressursbruk. Nye metodar og løysingar skal vurderast opp mot nytte, ressursbruk og alvorlegheit.

Behovet for spesialisthelsetenester aukar. Fleire eldre, fleire pasientar med kroniske sjukdommar og fleire med samansette behov gjer det viktigare å prioritere pasientar med størst behov og alvorleg tilstand.

Samtidig må Helse Vest sikre rask og likeverdig tilgang til tenester. Uønskt variasjon i ventetid, kvalitet, pasienttryggleik eller behandlingstilbod kan svekkje tilliten til helsetenesta og gi dårlegare resultat for pasientane.

Helsekompetanse, samval, brukarmedverknad og pasientrapporterte data blir viktigare for å styrkje kvalitet, meistring og pasienttryggleik. Pasientar og pårørande må få informasjon og støtte som gjer det mogleg å ta gode val og leve best mogleg med sjukdom.

Habilitering, rehabilitering, læring og meistring er sentrale delar av ei berekraftig helseteneste. Dette er viktig for at pasientar skal kunne meistre kvardagen, delta i arbeid, utdanning og samfunnsliv, og unngå unødvendig forverring eller reinnlegging.

Forsking, innovasjon og kvalitetsforbetring må vere tett kopla til klinisk praksis. Innsatsen skal rettast mot område der behovet er stort, der variasjonen er uønskt, eller der nye løysingar kan gi betre kvalitet og meir berekraftig bruk av ressursar.

Oppfølginga av målet skal vise om pasientane får raskare, tryggare og meir likeverdige tenester.

Helse Vest skal særleg følgje utviklinga i ventetider, fristbrot, kvalitet, pasienttryggleik, pasienterfaringar, bruk av pasientrapporterte data og uønskt variasjon mellom fagområde og geografiske område.

Oppfølginga skal også vise om prioriterte tiltak gir effekt, og om ressursar i større grad blir brukte på pasientbehandling med høg nytte og stort behov.