Vi tilrår at du alltid nyttar siste versjon av nettlesaren din.

Mål 4

Vi styrkjer regional samordning av helsetenester og stabs- og støttefunksjonar for å sikre betre ressursbruk og berekraftig drift

Helse Vest skal utviklast som eit forpliktande regionalt fellesskap. Tenester, kapasitet, kompetanse, arbeidsprosessar og støttefunksjonar skal samordnast der dette gir betre kvalitet, mindre sårbarheit, meir likeverdige tenester eller betre bruk av samla ressursar.

Regional samordning er ikkje eit mål i seg sjølv. Ho skal bidra til betre pasienttenester, meir robust drift, betre styringsinformasjon og meir tid til pasientretta og fagleg nødvendige oppgåver.

Målet gjeld i første rekkje føretaksgruppa i Helse Vest. Private ideelle verksemder og andre samarbeidspartar kan inngå i relevante samordningsinitiativ innanfor avtalte rammer.

Dei neste fire åra skal vi

  • vurdere funksjonsfordeling og samling av tenester ut frå kvalitet, pasienttryggleik, volum, kompetanse, vaktberedskap, reisebelastning, økonomi og beredskap
  • standardisere og forenkle arbeidsprosessar på tvers av føretaka der dette reduserer uønskt variasjon, dobbeltarbeid og administrativ belastning
  • vidareutvikle felles administrative støttefunksjonar der dette gir betre kvalitet, mindre sårbarheit, betre styringsinformasjon eller meir effektiv drift
  • utvikle betre styringsinformasjon gjennom felles data, definisjonar, analysegrunnlag og standardiserte prosessar
  • utvikle meir samordna forsynings- og logistikkløysingar, inkludert betre forsyningsberedskap

Fram mot 2041 skal Helse Vest bruke samla regional kapasitet og kompetanse betre. Tenestene skal utviklast ut frå kva som gir best samla resultat for pasientane, fagmiljøa og regionen.

Helse Vest skal vurdere samling eller samordning av funksjonar når kvalitet, pasienttryggleik, beredskap, fagleg berekraft eller ressursbruk krev det. Samtidig skal desentraliserte tilbod vidareutviklast når dette er fagleg forsvarleg, ønskjeleg for pasientane og gir god nytte.

Fleire arbeidsprosessar, støttefunksjonar og digitale løysingar skal vere felles der dette gir betre kvalitet, mindre variasjon, mindre dobbeltarbeid og meir effektiv drift. Standardisering skal brukast der like arbeidsmåtar gir betre resultat, men skal ikkje hindre nødvendig fagleg eller lokal tilpassing.

Helse Vest skal ha betre felles styringsinformasjon. Felles data, definisjonar og arbeidsprosessar skal gi styret, leiinga og helseføretaka betre grunnlag for prioritering, oppfølging og læring på tvers.

Sjukehusapoteka Vest og Helse Vest IKT er del av føretaksgruppa og skal inngå i den samla utviklinga av tenester, teknologi, legemiddelforsyning, IKT, logistikk, beredskap og støttefunksjonar. Dei felleseigde nasjonale selskapa skal inngå der nasjonale fellesløysingar er viktige for å realisere måla i planen. Dette gjeld mellom anna innkjøp, bygg, pasientreiser og nødnett.

Helse Vest skal også bruke nasjonale fellesløysingar og dei felleseigde helseføretaka aktivt der dette gir betre kvalitet, meir standardiserte arbeidsprosessar, betre beredskap eller meir effektiv ressursbruk.

Helse Vest står i eit utfordringsbilete der behovet for tenester aukar raskare enn tilgangen på personell, økonomi og kapasitet. Då må den samla kapasiteten i regionen brukast betre.

Ulik praksis kan vere nødvendig når pasientbehov, geografi eller faglege forhold tilseier det. Men uønskt variasjon, dobbeltarbeid, parallelle løysingar og unødig administrasjon kan svekkje kvalitet, pasienttryggleik, arbeidsmiljø og ressursbruk.

Små og sårbare fagmiljø, krevjande vaktordningar, knapp kompetanse og store investeringsbehov gjer det nødvendig å vurdere oppgåvedeling og funksjonsfordeling meir samla. Nokre funksjonar må samlast for å sikre kvalitet og robustheit. Andre må vere nær pasientane for å sikre tilgang, samanheng og god ressursbruk.

Stabs- og støttefunksjonar er viktige for pasientbehandlinga. Gode felles løysingar for IKT, innkjøp, logistikk, økonomi, HR, analyse, legemiddelforsyning og bygg kan frigjere tid, redusere sårbarheit og gi betre styring.

Regional samordning krev tydeleg styring, godt partssamarbeid og brei involvering. Endringar må gjennomførast med vekt på kvalitet, pasienttryggleik, arbeidsmiljø, beredskap, lokal gjennomføringsevne og tillit mellom nivåa i føretaksgruppa.

Oppfølginga av målet skal vise om Helse Vest bruker samla kapasitet, kompetanse og støttefunksjonar betre. Helse Vest skal særleg følgje utviklinga i uønskt variasjon, kapasitetsutnytting, felles arbeidsprosessar, bruk av regionale løysingar, styringsinformasjon, administrative ressursar, forsyningssikkerheit og effekt av samordningstiltak.

Oppfølginga skal også vise om større samordnings- og endringstiltak gir forventa effekt for kvalitet, pasienttryggleik, arbeidsmiljø, ressursbruk og berekraftig drift.

Sist oppdatert 29.07.2026